បំណុលសាធារណៈ បំណុលពលរដ្ឋ និងបំណុលអាជីវកម្មនៅថៃ កំពុងស្ថិតក្នុងកម្រិតព្រមាន

ក្រុមប្រឹក្សាសេដ្ឋកិច្ចជាតិ និងអភិវឌ្ឈន៍សង្គមរបស់ថៃ បានអះអាងថា ទំហំបំណុលគ្រួសារ អាជីវកម្ម និងវិស័យសាធារណៈ កំពុងស្ថិតក្នុងស្ថានភាពដ៏អាក្រក់បំផុតមិនធ្លាប់មាន ដែលអាចទាញទម្លាក់កំណើនសេដ្ឋកិច្ចប្រទេសនេះឱ្យធ្លាក់ក្នុងវិបត្តិ។ បច្ចុប្បន្នបំណុលគ្រួសាររបស់ពលរដ្ឋមានទំហំរហូតដល់៨៨,៤% បំណុលអាជីវកម្មមាន៨៣,៥% និងបំណុលវិស័យសាធារណៈកើនដល់៦៣,៨%នៃផលិតផលក្នុងស្រុកសរុបរបស់ប្រទេសនេះ។ ហើយអ្វីដែលជាបន្ទុកធ្ងន់សម្រាប់សេដ្ឋកិច្ចថៃនោះ គឺ៦០%នៃបំណុលដែលកំពុងមានបញ្ហាបានកើតឡើងចំពោះសហគ្រាសធុនតូច និងមធ្យម ដែលជាឆ្អឹងខ្នងដ៏សំខាន់លក្នុងការជួយទ្រទ្រង់កំណើនសេដ្ឋកិច្ចថៃ។

លោក វិឆាយ៉ាយុទ្ធ ប៊ូនជិត (Wichayayuth Boonchit ) អគ្គលេខាធិការរងនៃក្រុមប្រឹក្សាសេដ្ឋកិច្ចជាតិ និងអភិវឌ្ឈន៍សង្គមរបស់ថៃ បានចាត់ទុកកំណើនបំណុលនេះកំពុងក្លាយជាឧបសគ្គដ៏ធំមួយក្នុងការពង្រីកនិងពង្រឹងសកម្មភាពសេដ្ឋកិច្ចរបស់ប្រទេសដែលមានសេដ្ឋកិច្ចធំជាងគេបំផុតលំដាប់ទីពីរនៅអាស៊ាននេះ។

ដោយឡែកមូលនិធិរូបិយវត្ថុអន្តរជាតិ (IMF) ក៏បានបង្ហាញការព្រួយបារម្ភចំពោះស្ថានភាពបំណុលដ៏ខ្ពស់របស់ថៃផងដែរ។ IMF រំលឹកថា ទំហំបំណុលសាធារណៈរបស់ថៃ កំពុងបោះជំហានទៅរកពិដានកំណត់នៃបំណុលហើយ។ បើតាមការអះអាងរបស់ស្ថាប័នហិរញ្ញវត្ថុនេះ ពិដានបំណុលរបស់ថៃ ដែលច្បាប់អនុញ្ញាតមានត្រឹម៧០% នៃ GDP ប៉ុណ្ណោះ។ ទន្ទឹមនឹងនេះ IMF ក៏បានផ្តល់ដំបូន្មានឱ្យថៃ គួរតែជៀសវាងការបង្កើនសម្ពាធបំណុលលើវិស័យសាធារណៈបន្ថែមទៀត ហើយគួរផ្តោតលើការជំរុញការប្រមូលចំណូល និងកែលម្អប្រសិទ្ធភាពថវិកា៕

ដោយៈ សរ សុជាតិ