រ៉ែកម្រនឹងក្លាយជាមូលហេតុចម្បងជំរុញឱ្យកើតមានសង្គ្រាមយុទ្ធសាស្ត្ររវាងប្រទេសមហាអំណាច

កាលពីមុនប្រទេសមហាអំណាចអាចផ្ទុះសង្រ្គាមជាមួយគ្នា ក៏ព្រោះតែចង់ដណ្តើមការគ្រប់គ្រងថាមពល ជាពិសេសប្រេង និងឧស្ម័ន ប៉ុន្តែនៅសតវត្សរ៍ទី២១នេះ រូបភាពនៃការប្រណាំងប្រជែងថ្មីរបស់ប្រទេសមហាអំណាច គឺរ៉ែកម្រ ខណៈបច្ចេកវិទ្យាថ្មីៗរួមទាំងបញ្ញាសិប្បនិម្មិតសុទ្ធតែត្រូវការវាច្រើនជាងត្រូវការប្រេង និងឧស្ម័ន។

បើយោងតាមសារព័ត៌មាន CNBC សហរដ្ឋអាម៉េរិកបងធំពិភពលោកនៅពេលនេះ កំពុងកំណត់អាទិភាពលើការបង្កើនបរិមាណស្តុកធនធានរ៉ែកម្រ ដើម្បីរក្សាសក្តានុពល និងអានុភាពយោធា និងលើកកម្ពស់ គោលនយោបាយឧស្សាហកម្មរបស់ខ្លួន។

វិទ្យាស្ថានស្រាវជ្រាវកិច្ចការអន្តរជាតិឯករាជ្យមួយមានមូលដ្ឋាននៅទីក្រុងឡុងដ៏ ចក្រភពអង់គ្លេស បានបញ្ជាក់នៅក្នុងរបាយការណ៍ថ្មីមួយរបស់ខ្លួនថា លោហៈធាតុ និងរ៉ែកម្រនឹងក្លាយរលកនៃការប្រកួតប្រជែងមួយថ្មីរបស់មហាអំណាច។ ជាក់ស្តែងអាម៉េរិកគ្រោងចំណាយរហូតដល់១២ពាន់លានដុល្លារ ដើម្បីប្រមូលទិញធនធានរ៉ែកម្រពីអាស៊ី និងអឺរ៉ុបមកស្តុកទុក ដើម្បីធានាស្ថិរភាពវិស័យសន្តិសុខជាតិ និងគោលនយោបាយឧស្សាហកម្មរបស់ខ្លួន។ នេះគឺជានិន្នាការសកលថ្មី ដែលប្រទេសនីមួយៗត្រូវតែធានាឱ្យបាននូវសក្តានុពលភាវូបនីយកម្មលើវិស័យការពារជាតិ និងផលិតកម្មឌីជីថល។

មិនមែនមានតែអាមេរិកនោះទេ សូម្បីអូស្ត្រាលី ដែលធ្លាប់តែជាអ្នកនាំចេញរ៉ែកម្រដ៏ធំមួយក៏បានប្តូរមកស្តុកទុករ៉ែកម្រយុទ្ធសាស្ត្រក្នុងតម្លៃជាង៨០០លានដុល្លារ ខណសហភាពអឺរ៉ុបកំពុងជំរុញការបង្កើតទុនបម្រុងរ៉ែ ដើម្បីកាត់បន្ថយការពឹងផ្អែកលើខាងក្រៅ។ ជាមួយគ្នានេះ ចិនដែលជាអ្នកផ្គត់ផ្គង់ធំជាងគេបំផុតនៅលើពិភពលោក ក៏កំពុងរឹតបន្តឹងការគ្រប់គ្រងការនាំចេញរ៉ែកម្រ ខណៈឥណ្ឌា និងប្រេស៊ីល ក៏ចាប់ផ្តើមដាក់ចេញនូវគោលនយោបាយរឹតត្បិតការនាំចេញរ៉ែកម្ររបស់ខ្លួនផងដែរ៕

ដោយៈ សរ សុជាតិ