មន្ត្រីជាន់ខ្ពស់រដ្ឋាភិបាល និងអ្នកជំនាញ មើលឃើញពីពន្លឺនៃសន្ដិភាព ក្រោយកិច្ចប្រជុំត្រីភាគី ចិន-កម្ពុជា-ថៃ បានបញ្ចប់

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានថ្លែងក្នុងសន្និសីទសារព័ត៌មាន ក្រោយកិច្ចប្រជុំត្រីភាគីនេះថា ជំនួបពិភាក្សាទល់មុខគ្នារវាងប្រមុខការទូតកម្ពុជា ចិន និង​ថៃ បានផ្ដល់សារសំខាន់ ក្នុងការធានាឱ្យមានប្រក្រតីភាពឡើងវិញ នូវទំនាក់ទំនងរវាងប្រទេសទាំងពីរកម្ពុជាថៃ ឈានទៅរកការសម្រេចបាននូវ សន្តិភាពរួមមួយនាពេលខាងមុខ។ តាមរយៈកិច្ចប្រជុំនេះ កម្ពុជា និង​ថៃ សុទ្ធតែបានបង្ហាញពីឆន្ទៈក្នុងការស្វែងរកសន្ដិភាព ដោយមិនមានភាគីណាមួយចង់ត្រឡប់ទៅរកស្ថានភាពសង្រ្គាមវិញនោះទេ។

​ជាមួយគ្នានេះ លោកបណ្ឌិត គិន ភា អ្នកជំនាញវិទ្យាសាស្រ្តនយោបាយ បានលើកឡើងថា វាពិតជាមានសារសំខាន់ខ្លាំងណាស់នៅក្នុងន័យការទូត ដ្បិតថា ចិន ជាប្រទេសមហាអំណាចក្នុងតំបន់ ដែលអាចធ្វើជាអាជ្ញាកណ្ដាល ដើម្បីដោះស្រាយបញ្ហាព្រំដែនកម្ពុជា និងថៃ បានយ៉ាងមានប្រសិទ្ធភាព។ អ្នកជំនាញរូបនេះ រំពឹងខ្ពស់ថា តាមរយៈកិច្ចប្រជុំត្រីភាគីនេះ នឹងអាចបង្កើនការជឿទុកចិត្តគ្នាឡើងវិញរវាងកម្ពុជានិងថៃ ហើយអាចធ្វើឱ្យភាគីទាំងសងខាងគោរពតាមការសន្យា ដែលបានព្រមព្រៀងគ្នា ក្នុងការទប់ស្កាត់មិនឱ្យផ្ទុះសង្គ្រាមបន្តទៀត។ ប៉ុន្ដែ គេក៏មិនត្រូវមើលរំលងពីការចូលរួមរបស់អាម៉េរិក និង​អាស៊ាន ដ្បិតភាគីទាំងពីរនេះ ក៏មានឥទ្ធិពលខ្លាំងក្នុងការជំរុញឱ្យភាគីថៃ ឱ្យអនុវត្តគោរពតាមបទឈប់បាញ់ដែរ។

​តាមការអះអាងរបស់ឯកឧត្តម ប្រាក់ សុខុន បើគ្មានអ្វីប្រែប្រួលទេ នៅវេលាម៉ោង ១២ថ្ងៃត្រង់ ថ្ងៃទី ៣០ ខែធ្នូ ភាគីថៃ នឹងដោះលែងទាហានកម្ពុជាទាំង ១៨នាក់ ដែលថៃ ចាប់ខ្លួនយកទៅ ដើម្បីឱ្យពួកគេមានសេរីភាពអាចវិលមកជួបជុំក្រុមគ្រួសារ សាច់ញាតិវិញហើយ ពោលគឺ ក្រោយពេលដែល តាមដានការអនុវត្តបទឈប់បាញ់រវាងកម្ពុជា និងថៃ បានគ្រប់រយៈពេល ៧២ម៉ោង តាមអ្វីដែលភាគីទាំងពីរព្រមព្រៀងគ្នា កាលពីថ្ងៃទី ២៧ ខែធ្នូ ឆ្នាំ២០២៥៕

អត្ថបទដោយ៖ ជា ម៉ារ៉ា