ជម្លោះព្រំដែនខ្មែរ-ថៃ អាចជាដុំថ្មក្តៅ និងសម្ពាយបញ្ហាដ៏ធ្ងន់ធ្ងរមួយសម្រាប់ហ្វីលីពីន នៅពេលធ្វើជាប្រធានអាស៊ានឆ្នាំក្រោយ

​មរតកបញ្ហាទាំងនេះសុទ្ធតែជាបញ្ហាស្មុគស្មាញសម្រាប់អាស៊ានខ្លួនឯង និងបញ្ហាសណ្តាប់ធ្នាប់ពិភពលោក។ នេះបើយោងតាមការចុះផ្សាយរបស់សារព័ត៌មាន CNA។

​​ចាប់ពីថ្ងៃទី១ ខែមករា ឆ្នាំ២០២៦ តទៅ ហ្វីលីពីននឹងចូលកាន់តំណែងជាប្រធានប្តូរវេនអាស៊ាន សម្រាប់អាណត្តិពេញមួយឆ្នាំ២០២៦ ដោយនៅក្នុងអាណត្តិនេះអាចមានបញ្ហាប្រឈមថ្មីៗ និងមរតកបញ្ហាស្មុគស្មាញជាច្រើន ទុកឲ្យហ្វីលីពីនស្ពាយបញ្ហា និងត្រូវទទួលរ៉ាប់រងដោះស្រាយ​។ បញ្ហាដែលជាថ្មក្តៅទាំងនោះ រួមមាន សង្គ្រាមស៊ីវិលនៅមីយ៉ាន់ម៉ា និងការបោះឆ្នោតនៅប្រទេសនេះ ដែលស្ទើរតែគ្មាននរណាម្នាក់ជឿថា ជាការបោះឆ្នោតដោយសេរី និងយុត្តិធម៌នោះទេ។ បន្ថែមលើនេះ ជម្លោះរវាងកម្ពុជា និងថៃ ក៏ដូចជាបញ្ហាបោះឆ្នោតនៅថៃ ក៏អាចជាបញ្ហាមួយសម្រាប់ហ្វីលីពីន ផងដែរ។ ហើយអ្វីដែលកាន់តែធ្ងន់ធ្ងរជាងនេះទៀតនោះ គឺបញ្ហា នៃការគ្រប់គ្រងទំនាក់ទំនងជាមួយប្រទេសចិន។

បច្ចុប្បន្នមីយ៉ាន់ម៉ា កំពុងជាប់គាំងជាមួយសង្គ្រាមស៊ីវិល ខណៈកម្ពុជា និងថៃ កំពុងមានអរិភាពព្រំដែនជាមួយគ្នា ដែលមកទល់ពេលនេះមិនទាន់អាចរកច្រកចេញបាននៅឡើយទេ។ បញ្ហាជម្លោះដ៏រ៉ាំរ៉ៃរវាងហ្វីលីពីន ជាមួយចិន នៅសមុទ្រចិន ខាងត្បូង នៅតែបន្ត ទោះបីមានសេចក្តីរាយការណ៍ថា ចិន និងប្រទេសទំនាស់កំពុងផ្តោតលើការរៀបចំក្រមប្រតិបត្តិនៅសមុទ្រជម្លោះនោះក៏ដោយ។

ទោះបីក្រមប្រតិបត្តិសមុទ្រចិន ខាងត្បូង ដែលបានចរចាគ្នាអស់រយៈពេលប្រមាណ៨ឆ្នាំមកនេះត្រូវគេជឿថា ជិតលេចចេញជារូបរាងក៏ដោយ តែនៅមានសេណារីយូជាច្រើន ដែលគេជឿថា វាអាចគ្រាន់តែជាការបញ្ចប់ដោយនិមិត្តរូបតែប៉ុណ្ណោះ។

ក្រៅពីមរតកបញ្ហា សន្ទុះនៃការរីកចម្រើនសេដ្ឋកិច្ចយ៉ាងឆាប់រហ័សរបស់វៀតណាម និងការដណ្តើមតួនាទីជាបងធំសេដ្ឋកិច្ចលំដាប់ទី២នៅអាស៊ានពីថៃ របស់វៀតណាម វិបត្តិបំណុលនៅឡាវ បញ្ហាឧក្រិដ្ឋកម្មតាមអនឡាញ គឺសុទ្ធតែជាបញ្ហាពាក់ព័ន្ធនឹងមជ្ឈភាព និងរាំងស្ទះដល់គម្រោងធ្វើសមាហរណកម្មរបស់អាស៊ាន៕

ដោយៈ សរ សុជាតិ