បើតាមប្រភព័ត៌មានពីសារព័ត៌មានអន្តរជាតិ ធំៗ បានរាយការណ៍ថា សិង្ហបុរី បានជាប់ចំណាត់ថ្នាក់ជាប្រទេសដែលត្រៀមខ្លួនរួចជាស្រេចសម្រាប់យុគសម័យ AI ដោយឈរនៅលំដាប់ទីមួយក្នុងសន្ទស្សន៍ 2025 AI Maturity Index ដែលធ្វើការស្ទាបស្ទង់ដោយក្រុមហ៊ុនសេវាកម្មអនឡាញរបស់សហរដ្ឋអាម៉េរិក Coursera ។
សន្ទស្សន៍ដែលបានចេញផ្សាយកាលពីខែកក្កដា បានវាយតម្លៃប្រទេសចំនួន ១០៩ នៅក្នុងនោះ សិង្ហបុរី ជាប់លំដាប់កំពូលតាមពីក្រោយ ដោយប្រទេសដាណឺម៉ាក និង ប្រទេសស្វីស ។
សេចក្តីរាយការណ៍នេះក៏ត្រូវបានបញ្ជាក់បន្ថែមតាមរយៈអត្ថបទមួយរបស់សារព័ត៌មាន the Straits Times ផងដែរ ។
សិង្ហបុរី បាននាំមុខគេទាំងផ្នែកការត្រៀមខ្លួនសម្រាប់ AI និងបច្ចេកវិទ្យាពាក់ព័ន្ធ ហើយជាប់ចំណាត់ថ្នាក់លេខ ៣ នៅក្នុងផ្នែកអាជីវកម្ម និងទី៥ ផ្នែកវិទ្យាសាស្ត្រទិន្នន័យ។ ជាមួយនឹងសមត្ថភាពដ៏វិជ្ជមាននេះហើយ ដែលធ្វើឱ្យសិង្ហបុរី ក្លាយជាប្រទេសដែលត្រៀមរួចជាស្រេចខាង AI នៅលើពិភពលោក ។
តាម Coursera មូលដ្ឋាន ដែលខ្លួនហ៊ានសន្និដ្ឋានបែបនេះ គឺដោយឈរនៅលើការវាយតម្លៃ មិនត្រឹមតែលើតួរលេខចុះឈ្មោះចូលរៀននៅក្នុងវគ្គសិក្សា ដែលទាក់ទងនឹង AI ប៉ុណ្ណោះទេ ប៉ុន្តែថែមទាំងលើលទ្ធផលស្រាវជ្រាវពីស្ថាប័នឧត្តមសិក្សាក្នុងស្រុក និងទិន្នន័យពីសន្ទស្សន៍នៃការត្រៀមលក្ខណៈ AI របស់មូលនិធិរូបិយវត្ថុអន្តរជាតិ ដែលបានធ្វើជាបន្តបន្ទាប់ផងដែរ ។
លោក ស៊ីម៉ន ឆេស្តេមេន ( Simon Chesterman ) នាយកជាន់ខ្ពស់ផ្នែកអភិបាលកិច្ច AI នៅ AI Singapore បាននិយាយថា ការរកឃើញនេះឆ្លុះបញ្ចាំងពីការកើនឡើងនៃត្រៀមខ្លួន ក្នុងចំណោមប្រជាជនសិង្ហបុរីសម្រាប់ការរៀនអំពី AI។
លោកបានសន្មត់ថា ការរីកចម្រើនរបស់សិង្ហបុរី លើផ្នែក AI គឺជាការឆ្លើយតបទៅនឹងគំនិតផ្តួចផ្តើមរបស់រដ្ឋាភិបាលសិង្ហបុរី តាមរយៈគម្រោង SkillsFuture Singapore សំដៅលើការលើកតម្កើងការអប់រំលើផ្នែកបច្ចេកវិទ្យា ។
ដោយឡែកនាយកប្រតិបត្តិ Coursera លោក ហ្គ្រី ហាត (Greg Hart) បាននិយាយថា ការរៀនសម្របសម្រួលនឹង AI ជាវិធីដ៏អស្ចារ្យមួយដើម្បីតៀមខ្លួនទុកជាមុន៕
ដោយៈ សរ សុជាតិ
