អាជ្ញាធរគយកូរ៉េ កំពុងបង្ក្រាបបណ្តាក្រុមហ៊ុនចិន ដែលសម្រុកនាំចូលទំនិញទៅកូរ៉េ ដើម្បីបិទស្លាកបន្លំសម្រាប់នាំចេញទៅអាម៉េរិក

អាជ្ញាធរគយកូរ៉េខាងត្បូង បានប្រើធម៌ក្ដៅបង្ក្រាបបណ្ដាក្រុមហ៊ុនចិន ដែលកំពុងតែលេងល្បិចសម្រុកនាំចូលទំនិញទៅកូរ៉េខាងត្បូង ដើម្បីបិទស្លាកបន្លំក្នុងគោលបំណងនាំចេញទៅសហរដ្ឋអាម៉េរិក ក្នុងបំណងគេចពន្ធខ្ពស់កប់ពពក២៤៥%។ អាជ្ញាធរគយរបស់ប្រទេសនេះ បានបញ្ជាក់ ថា ទំនិញនាំចេញទៅអាម៉េរិកនេះបន្លំបិទស្លាកជាផលិតផលកូរ៉េ តែធាតុពិតជាផលិតផលចិន។

អាជ្ញាធរគយកូរ៉េខាងត្បូង បានអះអាងថា ទំហំនេះស្មើនឹង៨៥%ទៅហើយនៃករណីបិទស្លាកបន្លំផលិតផលសរុបដែលខ្លួនបានរកឃើញ និងបង្ក្រាបបាន នៅក្នុងឆ្នាំ២០២៤។ អាជ្ញាធរគយកូរ៉េខាងត្បូង បានអះអាងថា បណ្ដាក្រុមហ៊ុនចិន ជឿថា មធ្យោបាយតែមួយគត់ដើម្បីគេចផុតពីពន្ធគយដ៏ខ្ពស់របស់សហរដ្ឋអាម៉េរិក គឺមានតែការបិទស្លាកបន្លំធ្វើជាផលិតផលប្រទេសផ្សេងប៉ុណ្ណោះ ហើយទន្ទឹមនេះក៏មានក្រុមហ៊ុនចិនខ្លះលក់ផលិតផលបញ្ចុះតម្លៃច្រើនផងដែរ។

អាជ្ញាធរគយកូរ៉េខាងត្បូង បានបង្កើតក្រុមការងារពិសេសមួយ ដើម្បីបញ្ឈប់ និងទប់ស្កាត់ការបិទស្លាកបន្លំផលិតផលនេះ ហើយបានព្រមានថា ការបិទស្លាកបន្លំផលិតផលបែបនេះអាចធ្វើឱ្យប៉ះពាល់យ៉ាងខ្លាំងដល់កេរ្តិ៍ឈ្មោះរបស់ប្រទេសកូរ៉េខាងត្បូង និងអាជីវកម្មក្នុងស្រុក។

វិធានការនេះធ្វើឡើងមុនពេលកូរ៉េខាងត្បូង ចរចាពាណិជ្ជកម្មជាមួយសហរដ្ឋអាម៉េរិក ដើម្បីបង្ហាញដល់រដ្ឋបាលរបស់លោក ដូណាល់ ត្រាំ ថា ខ្លួនកំពុងចាត់វិធានការបង្ក្រាបការគេចពន្ធ ជាពិសេសលើក្រុមហ៊ុនចិនតែម្ដង៕

ដោយ: តែម សុខុម