ចារកម្មកូរ៉េខាងត្បូង បានទម្លាយថា លោក គីម ជុងអ៊ុន កំពុងត្រួសត្រាយផ្លូវឱ្យកូនស្រីខ្លួនឱ្យឡើងស្នងតំណែង

អង្គភាពចារកម្មកូរ៉េខាងត្បូង (NIS) កំពុងតាមដានយ៉ាងដិតដល់នូវរាល់សកម្មភាពរបស់កញ្ញា គីម ជូអ៊ែ ជាពិសេសលទ្ធភាពនៃការបង្ហាញខ្លួនក្នុងកិច្ចប្រជុំសំខាន់ៗរបស់គណបក្សពលករកូរ៉េ ដែលកំពុងកាន់អំណាច។ សំណួរសំខាន់ដែលអ្នកវិភាគកំពុងជជែកគ្នា ថាតើកូនស្រីរបស់លោក គីម ជុងអ៊ុន នឹងបង្ហាញខ្លួនក្នុងកិច្ចប្រជុំរបស់គណបក្សពលករក្នុងឋានៈជាអ្វី ហើយថាតើនឹងមានការតែងតាំងតំណែងផ្លូវការណាមួយសម្រាប់នាងនាំពេលឆាប់ៗនេះដែរ ឬទេ?

លោក លី សុងក្វេន (Lee Seong-kweun) សមាជិកសភាកូរ៉េខាងត្បូង បានទម្លាយបន្ទាប់ពីបានស្តាប់របាយការណ៍សម្ងាត់ពីភ្នាក់ងារចារកម្មកូរ៉េខាងត្បូងថា ពីមុនឡើយកញ្ញា គីម ជូអ៊ែ ត្រូវបានគេមើលឃើញថា គ្រាន់តែជាអ្នករៀនសូត្រពីការងារ ប៉ុន្តែពេលនេះ នាងកំពុងស្ថិតក្នុងដំណាក់កាល នៃការផ្តល់ឋានជាអ្នកស្នងតំណែងផ្ទៃក្នុងស្រេចទៅហើយ។

កញ្ញា គីម ជូអ៊ែ ដែលស្ថិតក្នុងវ័យ១៣ឆ្នាំ បានបង្ហាញខ្លួនកាន់តែញឹកញាប់នៅក្នុងប្រព័ន្ធផ្សព្វផ្សាយរដ្ឋរបស់កូរ៉េខាងជើង។ នាងតែងតែអមដំណើរឪពុកទៅកាន់ទីតាំងយុទ្ធសាស្ត្រសំខាន់ៗរួមទាំងការចុះត្រួតពិនិត្យឃ្លាំងអាវុធ និងការបង្ហោះមីស៊ីល ដែលសកម្មភាពទាំងនេះឆ្លុះបញ្ចាំងឱ្យឃើញថា នាងកំពុងត្រូវបានបណ្តុះបណ្តាលឱ្យក្លាយជាមេដឹកនាំជំនាន់ទី៤ នៃរបបកុម្មុយនីស្តគ្រួសារនិយមមួយនេះ។

របាយការណ៍ចារកម្មកូរ៉េខាងត្បូង ក៏បានផ្ដល់ព័ត៌មានលម្អិតអំពីគ្រួសារត្រកូលគីមថា លោក គីម ជុងអ៊ុន មានកូនចំនួន៣នាក់ ដោយកញ្ញា គីម ជូអ៊ែ ជាកូនទី២ ខណៈបងប្រុសច្បងរបស់នាងត្រូវបានគេរាយការណ៍ថា មានបញ្ហាសុខភាពផ្លូវចិត្ត ឬសតិស្មារតីមិនអំណោយផល ដែលជាហេតុធ្វើឱ្យឪពុកងាកមកសម្លឹងលើកញ្ញា គីម ជូអ៊ែ ជំនួសវិញ។

បច្ចុប្បន្នយុវតី ជូអ៊ែ កំពុងសិក្សានៅវិទ្យាល័យក្នុងទីក្រុងព្យុងយ៉ាង ហើយនៅពេលទំនេរនាងតែងតែចំណាយពេលសម្រាកលម្ហែកាយនៅភូមិគ្រឹះជាប់មាត់សមុទ្រក្នុងក្រុងវ៉ុនសាន។ ក្រៅពីកិច្ចការរដ្ឋ នាងត្រូវបានគេដឹងថា មានចំណង់ចំណូលចិត្តខាងកីឡាហែលទឹក ជិះស្គី ជាពិសេសនាងជាអ្នកជិះសេះដ៏ពូកែ ដែលជាចំណុចមួយធ្វើឱ្យលោក គីម ជុងអ៊ុន ពេញចិត្ត និងស្រឡាញ់នាងខ្លាំងបំផុត៕

អត្ថបទៈ សួន ឡង់ទី​