រដ្ឋមន្ត្រីការបរទេសអេស្ប៉ាញ លោក Jose Manuel Albares បានលើកឡើងថា អឺរ៉ុប គួរតែធ្វើសមាហរណកម្មឧស្សាហកម្មការពារជាតិរបស់ខ្លួន និងប្រមូលផ្តុំឃ្លាំងសព្វាវុធ និងយោធូបករណ៍ផ្សេងៗ ដោយនិយាយថា កងកម្លាំងរួមនេះនឹងមានប្រសិទ្ធភាព និងអានុភាពខ្លាំងជាងការរក្សាកងទ័ពជាតិ ចំនួន២៧ប្រទេសដាច់ដោយឡែកពីគ្នា។ លោកបាននិយាយថា ការបង្កើតសម្ពន្ធភាពនៃរដ្ឋជាសមាជិកដែលមានឆន្ទៈស្របគ្នានេះ នឹងបង្កើនសមត្ថភាពរបស់អឺរ៉ុប ក្នុងការឆ្លើយតបទៅនឹងការគំរាមកំហែងសន្តិសុខ។
ការអត្ថាធិប្បាយរបស់រដ្ឋមន្ត្រីការបរទេសអេស្ប៉ាញរូបនេះបានកើតឡើង មុនកិច្ចប្រជុំបន្ទាន់នៃក្រុមមេដឹកនាំសហភាពអឺរ៉ុប នៅទីក្រុងព្រុចសែល ប្រទេសបែលហ្ស៊ិក ដើម្បីសម្របសម្រួលការឆ្លើយតបទៅនឹងការគំរាមកំហែងរបស់ប្រធានាធិបតីអាម៉េរិក លោក ដូណាល់ ត្រាំ ក្នុងការទិញយក ឬការដាក់បញ្ចូលកោះ Greenland ជាទឹកដីរបស់សហរដ្ឋអាម៉េរិក ដែលជាជម្លោះធ្វើឱ្យទំនាក់ទំនងឆ្លងមហាសមុទ្រអាត្លង់ទិកកាន់តែតានតឹង។ កិច្ចប្រជុំនេះនឹងនៅតែបន្តធ្វើធម្មតាតាមផែនការ ទោះបីជាលោក ដូណាល់ ត្រាំ បាននិយាយថា លោកបានឈានដល់ក្របខ័ណ្ឌសម្រាប់កិច្ចព្រមព្រៀងជាមួយអគ្គលេខាធិការអង្គការ NATO លោក Mark Rutte យ៉ាងណាក៏ដោយ។
រដ្ឋមន្ត្រីការបរទេសអេស្ប៉ាញ បានសង្កត់ធ្ងន់ថា កងទ័ពរួមរបស់សហភាពអឺរ៉ុប ដែលលោកជំរុញឱ្យបង្កើតឡើងនេះ គឺមិនមែនដើម្បីជំនួសអង្គការ NATO នោះទេ ប៉ុន្តែវានឹងបំពេញបន្ថែមទៅលើអង្គការ NATO ដោយនិយាយថា អឺរ៉ុបត្រូវបង្ហាញថា ខ្លួនខ្លាំង រឹងមាំ ដែលគ្មានអ្នកណាអាចដាក់សម្ពាធសហភាពអឺរ៉ុបទាំងផ្នែកយោធា ឬផ្នែកសេដ្ឋកិច្ចបាននោះឡើយ៕
ដោយ: តែម សុខុម
