តើអាកាសយានដ្ឋានអន្តរជាតិ តេជោ តម្លៃជាង១ពាន់៥រយលានដុល្លារ ដែលគ្រោងសម្ពោធដាក់ឱ្យប្រើប្រាស់នៅសប្តាហ៍ក្រោយមានលក្ខណៈពិសេសអ្វីខ្លះ?

ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានគូសបញ្ជាក់ថា បើគ្មានការប្រែប្រួលទេ អាកាសយានដ្ឋានអន្តរជាតិ តេជោ នឹងបើកសម្ពោធដាក់ឱ្យដំណើរការនៅថ្ងៃទី៩ ខែកញ្ញា ឆ្នាំ២០២៥ ជំនួសអាកាសយានដ្ឋានអន្តរជាតិ ភ្នំពេញ ដែលបានបើកប្រតិបត្តិការអស់រយៈពេលប្រមាណជាង៦០ឆ្នាំកន្លងមកនេះ។ បើតាមការបញ្ជាក់របស់មន្ត្រីជាន់ខ្ពស់រូបនេះ អាកាសយានដ្ឋានអន្តរជាតិ តេជោ តម្លៃជាង១ពាន់៥រយលានដុល្លារនេះ មានលក្ខណៈពិសេសជាច្រើន បើធៀបនឹងព្រលានយន្តហោះចាស់ ពោលគឺព្រលានយន្តហោះថ្មីនេះត្រូវបានសាងសង់ឡើងជាប្រភេទ 4F ដែលជាស្តង់ដាធំជាងគេនៅក្នុងហេដ្ឋារចនាសម្ព័ន្ធសាងសង់អាកាសយានដ្ឋាន ដែលមានសមត្ថភាពអាចឱ្យយន្តហោះធុនយក្សគ្រប់ប្រភេទអាចអាចចុះចតបាន ខណៈព្រលានយន្តហោះចាស់ជាប្រទេស 4E ប៉ុណ្ណោះ។ អាកាសយានដ្ឋានអន្តរជាតិ តេជោ មានសមត្ថភាពស្វាគមន៍អ្នកដំណើរប្រចាំឆ្នាំរហូតដល់១៣លាននាក់ បន្ទាប់ពីដំណាក់កាលទី១ដាក់ឱ្យដំណើរការ ហើយនឹងកើនឡើងជាលំដាប់រហូតដល់៣០លាននាក់ នាពេលអនាគត។

​ពាក់ព័ន្ធស្ថាបត្យកម្មរបស់អាកាសយានដ្ឋានអន្តរជាតិ តេជោ មន្ត្រីជាន់ខ្ពស់អាកាសចរណ៍ស៊ីវិលរូបនេះ បានអះអាងថា ត្រូវបានគូសឡើងដោយស្ថាបត្យករដ៏ជំនាញលំដាប់ពិភពលោក ជាមួយនឹងរចនាបថដ៏ស្រស់ស្អាត ទំនើប និងទាក់ទាញជាមួយនឹងការគិតគូរយ៉ាងហ្មត់ចត់អំពីផាសុកភាពរបស់អ្នកធ្វើដំណើរ ដូច្នេះហើយទើបជំរុញឱ្យអាកាសយានដ្ឋានអន្តរជាតិនេះ បានស្ថិតក្នុងគម្រោងស្ថាបត្យកម្មដ៏ធំ និងមានឥទ្ធិពលបំផុតនៅលើពិភពលោកទាំង១១ នៅឆ្នាំ២០២៥នេះ។

គួរជម្រាបថា អាកាសយានដ្ឋានអន្តរជាតិ តេជោ ត្រូវបានសាងសង់នៅលើផ្ទៃដីប្រមាណ២ពាន់៦រយហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ៕