លោកស្រី ផៃថងថាន ស៊ីណាវ៉ាត្រា នាយករដ្ឋមន្ត្រីថៃ ដែលកំពុងខិតខំស្តារសេដ្ឋកិច្ច ដែលកំពុងធ្លាក់ចុះ និង កំពុងតែរក្សាសម្ពន្ធភាពក្នុងរដ្ឋាភិបាលចម្រុះដ៏ផុយស្រួយផង ហើយក៏កំពុងប្រឈមមុខនឹងការតវ៉ាក៏ដូចជាការបោះឆ្នោតសម្តែងការមិនទុកចិត្តនៅក្នុងសភាផងនោះ នៅព្រឹកថ្ងៃព្រហស្បតិ៍ លោកស្រីផែថងថាន បានចុះទៅច្រកព្រំដែនអារញ្ញប្រាថេត ក្នុងខេត្តស្រះកែវ ទល់មុខក្រុងប៉ោយប៉ែត ប្រទេសកម្ពុជា។ វត្តមានរបស់ លោកស្រី នៅតែទទួលការស្វាគមន៍ពីពលរដ្ឋថៃ ទោះប្រជាប្រិយភាពមានការធ្លាក់ចុះក៏ដោយ ហើយពាក់ព័ន្ធនឹងគោលបំណងនៃដំណើរទស្សនកិច្ចនេះ លោកស្រីបានអះអាងថា គឺដើម្បីអង្កេតការបង្ក្រាបបទល្មើសឆ្លងដែនដែលកំពុងបន្ត និងវាយតម្លៃពីផលប៉ះពាល់នៃការរឹតបន្តឹងព្រំដែន ដែលប្រទេសថៃ បានផ្អាករាល់យានជំនិះ ភ្ញៀវទេសចរ និងអាជីវករពីគ្រប់ច្រកព្រំដែនគោកចូលមកកម្ពុជា។
អ្នកវិភាគបានលើកឡើងថា ការដែលលោកស្រីបាននិយាយការបិទច្រកព្រំដេនជាមួយនឹងកម្ពុជា ភ្ជាប់គ្នាជាមួយនឹងបទល្មើសឆ្លងដែន ជាពិសេសឧក្រិដ្ឋកម្មតាមអនឡាញនេះ គឺគ្រាន់តែជាលេសបង្វែស្ថានការណ៍មួយពីបញ្ហាទំនាស់ព្រំដែនទៅជារឿងឧក្រិដ្ឋកម្មប៉ុណ្ណោះ។
អ្នកវិភាគបានបន្តលើកឡើងទៀតថា អ្នកដែលបិទពិតប្រាកដ គឺយោធា ហើយលោកស្រីខ្លួនឯងក៏ធ្លាប់បាននិយាយដែរថា លោកស្រីបានប្រគល់សិទ្ធិនេះទៅឱ្យយោធាជាអ្នកសម្រេច ខណៈដែលយោធា ត្រូវបានកាសែតថៃ ដកស្រង់សម្តីជាបន្តបន្ទាប់ ដែលបញ្ចាក់ថា បញ្ហានេះគឺជាបញ្ហាព្រំដែន។
នៅក្នុងថ្ងៃជាមួយគ្នានេះដែរ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ក៏បានចុះទៅព្រំដែន ទៅក្រុងសំរោង ខេត្តឧត្តរមានជ័យ និង ខេត្តព្រះវិហារ ផងដែរ។ នាឱកាសនោះ សម្តេចតេជោ បានមានប្រសាសន៍ថា បញ្ហាវិវាទព្រំដែនជាមួយថៃ លើកនេះ អាចនឹងយូរ ហើយអាចមានសង្រ្គាមយូរដែរ មិនដូចអ្វីដែលធ្លាប់កើតមានកាលពីប៉ុន្មានឆ្នាំមុននោះទេ។ ជាមួយគ្នានេះ សម្តេចតេជោ ក៏បានណែនាំប្រជាពលរដ្ឋជីកលេណដ្ឋាន ដើម្បីការពារខ្លួនហើយកុំភ្លេចការបង្កបង្កើនផល ទោះបីសភាពការណ៍កើតមានឡើងនៅព្រំដែនក៏ដោយ ខណៈដែលពេលនេះជារដូវវស្សាបានចូលមកដល់។
ដោយឡែកនៅភ្នំពេញ ឯណោះវិញ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបានចុះទៅព្រំដែនជួបទាហាន និងប្រជាពលរដ្ឋដែលត្រូវជម្លៀសមករកកន្លែងសុវត្ថិភាព ក្រោយមានការតានតឹងនៅព្រំដែន បានថ្លែងនៅក្នុងពិធីប្រគល់សញ្ញាបត្រនៅបណ្ឌិត្យសភានគរបាលកម្ពុជា ថា ភាពមិនច្បាស់លាស់ និងការប្រែក្រឡាស់ភ្លាមៗមិនពិតប្រាកដ នៃជំហរនយោបាយរបស់រដ្ឋាភិបាលថៃ រួមជាមួយភាពមិនស៊ីសង្វាក់គ្នារវាងគោលការណ៍ដែលថ្នាក់ដឹកនាំនយោបាយថៃ បានដាក់ចេញ និងការអនុវត្តជាក់ស្ដែងនៅលើដីដោយកងទ័ពថៃ បានបង្កជាឧបសគ្គសម្រាប់ការស្វែងរកដំណោះស្រាយព្រំដែនពិតប្រាកដ។
សម្តេចធិបតី បានបញ្ជក់ថា សម្តេចរង់ចាំមើលអ្នកដែលមានអំណាចពិតប្រាកដ និងជំហរច្បាស់លាស់នៅក្នុងប្រទេសថៃ ដែលអាចងាយស្រួលធ្វើការជាមួយគ្នាប្រកបដោយភាពជឿជាក់ ដើម្បីស្វែងរកដំណោះស្រាយរួមសម្រាប់ផលប្រយោជន៍ប្រទេស និងប្រជាជនទាំងពីរ។ សម្តេចធិបតី បានលើកឡើងថា ប្រក្រតីភាពនៃព្រំដែនរវាងប្រទេសទាំងពីរ គឺនៅលើការសម្រេចចិត្តរបស់ភាគីថៃ៕
ដោយៈ សរ សុជាតិ
