តុលាការថៃ បង្គាប់ឱ្យលោក ថាក់ស៊ីន ដែលជាប់ពន្ធនាគារ ត្រូវបង់លុយជាង ៥០០លានដុល្លារ ជុំវិញបណ្ដឹងថ្មីពាក់ព័ន្ធការគេចពន្ធ

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ហាក់ដូចជា យីអ៊ុនដាក់ អារក្សជាន់នៅឆ្នាំនេះ ដោយបានរងបណ្ដឹងមួយហើយមួយទៀតមិនទាន់ចប់ស្រួលបួលផង និងកំពុងជាប់ពន្ធនាគារនៅឡើយនោះ ពេលនេះបានរងបណ្ដឹងថ្មីមួយទៀតពាក់ព័ន្ធករណីគេចពន្ធកាលពីលោកអំណាចជានាយករដ្ឋមន្ត្រីថៃ។ បណ្តឹងថ្មីនេះ តុលាការថៃ តម្រូវឱ្យលោក ថាក់ស៊ីន បង់ពន្ធរហូតដល់ជាង៥០០លានដុល្លារអាម៉េរិក។

លោក ថាក់ស៊ីន បានរងបណ្ដឹងជាបន្តបន្ទាប់ ខណៈដែលកូនស្រីបង្កើតរបស់លោក គឺ លោកស្រី ផៃថងថាន ស៊ីណាវ៉ាត្រា ក៏ទើបត្រូវបានដកចេញពីតំណែងនាយករដ្ឋមន្ត្រីថ្មីៗនេះ ក្រោយបែកធ្លាយសារសន្ទនាតាមទូរសព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ទាក់ទិនបញ្ហាជម្លោះព្រំដែនកម្ពុជា-ថៃ។ លោក ថាក់ស៊ីន បច្ចុប្បន្នកំពុងអនុវត្តទោសមួយឆ្នាំក្នុងពន្ធនាគារ ក្រោយទទួលបានការបន្ធូរបន្ថយទោសពីបទរំលោភអំណាច៕

អត្ថបទ តែម សុខុម​