រដ្ឋាភិបាលថៃ ជំរុញឱ្យធ្វើវិសោធនកម្មច្បាប់ ដើម្បីបើកឱ្យវិនិយោគិនអាចជួលអចលនទ្រព្យរយៈពេល៩៩ឆ្នាំ

រដ្ឋាភិបាលថៃ កំពុងរៀបចំសេចក្ដីព្រាងច្បាប់មួយ ដើម្បីស្នើសុំធ្វើវិសោធនកម្មច្បាប់ ស្ដីពីសិទ្ធិលើការជួលទ្រព្យសកម្ម ដើម្បីពង្រីកលក្ខខណ្ឌនៃការជួលអចលនទ្រព្យនៅប្រទេសថៃ ឱ្យបានយូរជាងមុន។ សេចក្ដីព្រាងច្បាប់នេះ កំពុងស្ថិតក្រោមការពិគ្រោះយោបល់ជាសាធារណៈនៅឡើយមុននឹងដាក់ឱ្យគណៈរដ្ឋមន្ត្រីពិនិត្យ និងពិភាក្សា។

រដ្ឋាបាលដឹកនាំដោយគណបក្សភឿថៃ បានពិនិត្យគំនិតផ្តួចផ្តើមនេះតាំងពីការកាន់តំណែងរបស់អតីតនាយករដ្ឋមន្ត្រីថៃ លោក សេដ្ឋា ថាវីស៊ីន មកម្ល៉េះ ហើយនៅក្រោមរដ្ឋបាលបច្ចុប្បន្នដែលដឹកនាំដោយលោកស្រី ផែថងថាន ស៊ីណាវ៉ាត្រា ដែលត្រូវបានព្យួរតំណែង សេចក្តីព្រាងច្បាប់នេះ ទទួលបានកម្លាំងជំរុញកាន់តែខ្លាំង ជាពិសេសបន្ទាប់ពីការរុះរើគណៈរដ្ឋមន្ត្រីថ្មីៗនេះតែម្ដង។

ស្នូលនៃសេចក្តីព្រាងវិសោធនកម្មច្បាប់នេះ ពាក់ព័ន្ធនឹងការពង្រីករយៈពេលជួលអតិបរមាសម្រាប់ទ្រព្យសកម្មពី៣០ទៅ៩៩ឆ្នាំ ហើយការពង្រីកនេះមានបំណងធ្វើឱ្យសេដ្ឋកិច្ចរស់ឡើងវិញ និងទាក់ទាញការវិនិយោគ ជាពិសេសពីជនបរទេស ដែលកំពុងស្វែងរកការជួលដីរយៈពេលវែង។

ការផ្លាស់ប្តូរនេះ កំពុងស្ថិតក្រោមការត្រួតពិនិត្យដោយភ្នាក់ងាររដ្ឋាភិបាលដែលពាក់ព័ន្ធ ដោយក្រសួងមហាផ្ទៃ ជាអ្នកដឹកនាំច្បាប់នេះ ហើយក្រសួងហិរញ្ញវត្ថុជាអ្នកត្រួតពិនិត្យលើផលប៉ះពាល់ដ៏ទូលំទូលាយរបស់ច្បាប់នេះ។

លោកស្រី ម៉ាណាផន ឆារឿនស្រី (Manaporn Charoensri) អនុរដ្ឋមន្ត្រីក្រសួងដឹកជញ្ជូន និងជាទីប្រឹក្សារបស់រដ្ឋាភិបាល បាននិយាយថា រដ្ឋាភិបាលថៃ មានបំណងចង់ឃើញច្បាប់ស្តីពីសិទ្ធិជួលអចលនទ្រព្យ ដែលត្រូវបានធ្វើវិសោធនកម្មនេះត្រូវបានអនុម័តដោយសភាតំណាងរាស្រ្ត និងចូលជាធរមាននៅត្រឹមឆ្នាំ២០២៥នេះ៕

ដោយ៖ សុខ មង្គល