លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ កម្ពុជានៃរាជបណ្ឌិត្យសភាកម្ពុជា យល់ឃើញថា ការមកបំពេញទស្សនកិច្ចរបស់លោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីថៃ នៅកម្ពុជា មិនត្រឹមតែដើម្បីរឹតចំណងការទូតរវាងប្រទេសទាំងនោះទេ តែវាដំណើរទស្សនកិច្ចដ៏សំខាន់មួយសម្រាប់ប្រទេសទាំងពីរ។ សម្រាប់អ្នកជំនាញរូបនេះ ស្របពេលដែលបញ្ហាសង្រា្គមពន្ធរវាងសហរដ្ឋអាម៉េរិក និងចិន កាន់តែឡើងកម្តៅ តម្រូវឱ្យប្រទេសទាំងពីរ ចាំបាច់ត្រូវពិភាក្សាគ្នាលើការពង្រឹងសេដ្ឋកិច្ច ការផ្លាស់ប្តូរពាណិជ្ជកម្ម និងការវិនិយោគទ្វេភាគីឱ្យកាន់តែស៊ីជម្រៅបន្ថែមទៀត។ ក្រៅពីពិភាក្សាលើការវិនិយោគ សេដ្ឋកិច្ច និងពាណិជ្ជកម្ម អ្នកជំនាញរូបនេះជឿជាក់ថា ថ្នាក់ដឹកនាំទាំងពីរ ក៏នឹងពិភាក្សាគ្នាទៅលើការកសាងទំនុកចិត្តផ្នែកនយោបាយ ទេសចរណ៍ អប់រំ និងសុខភិបាល ផងដែរ។
បញ្ហាសន្តិសុខតាមព្រំដែន ការជួញដូរមនុស្ស គ្រឿងញៀន និងឧក្រិដ្ឋកម្មឆ្លងដែនជាដើម ក៏ជាកិច្ចការចាំបាច់ដែលថ្នាក់ដឹកនាំនៃប្រទេសទាំងពីរតែងតែលើកយកមកពិភាក្សាដើម្បីដោះស្រាយ និងទប់ស្តាត់ផងដែរ។ នេះបើតាមការបញ្ជាក់របស់ លោកបណ្ឌិត គិន ភា ដោយបានបន្ថែមថា ទោះជាយ៉ាងណា ពាក់ព័ន្ធនឹងបញ្ហាក្តៅជុំវិញបញ្ហាព្រំដែននៃប្រទេសទាំងពីរ គឺទំនងជាមិនអាចបញ្ចប់បានភ្លាមៗតាមរយៈដំណើរទស្សនកិច្ចនាពេលនេះនោះទេ ប៉ុន្តែនឹងអាចមានការចរចាទៅរកដំណោះស្រាយរួមតាមសន្តិវិធីណាមួយជាក់ជាពុំខាន។
អត្ថបទគួរអាន
ជាមួយគ្នានេះ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព យល់ឃើញថា ដំណើរទស្សនកិច្ចរបស់នាយករដ្ឋមន្ត្រីថៃ នៅកម្ពុជានេះ វាជាកិច្ចការចាំបាច់មួយ ស្របពេលប្រជាពលរដ្ឋនៃប្រទេសទាំងពីរកំពុងមានការខ្វែងគំនិតគ្នាលើបញ្ហាព្រំដែន។ អ្នកជំនាញរូបនេះរំពឹងថា ថ្នាក់ដឹកនាំនៃប្រទេសទាំងពីរ នឹងអាចមានសាររួមគ្នាមួយ ដើម្បីឆ្លើយតបទៅកាន់ប្រជាពលរដ្ឋទាំងសងខាងដោយសមស្រប។ បន្ថែមពីនេះដំណើរទស្សនកិច្ចនេះ ក៏ជាផ្នែកមួយដើម្បីឈានទៅរកការពង្រឹងកិច្ចសហប្រតិបត្តិការទ្វេភាគីបន្ថែមលើផ្នែកសេដ្ឋកិច្ច ពាណិជ្ជកម្មនៃប្រទេសទាំងពីរ ស្របពេលដែលកំពុងទទួលរងនូវសម្ពាធពន្ធពីសហរដ្ឋអាម៉េរិក។
បើតាមក្រសួងការបរទេស និងសហប្រតិបត្តិការអន្តរជាតិ នៅអំឡុងទស្សនកិច្ចនៅកម្ពុជា របស់លោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីថៃ ថ្នាក់ដឹកនាំនៃប្រទេសទាំងពីរមានជំនួបទ្វេភាគី ដើម្បីពិភាក្សាពីការកំណត់ទិសដៅសកម្មភាព ក្នុងការធ្វើឱ្យកាន់តែស៊ីជម្រៅ និងពង្រីកបន្ថែមទៀតនូវកិច្ចសហប្រតិបត្តិការដែលមានផលប្រយោជន៍ទៅវិញទៅមក។ ថ្នាក់ដឹកនាំទាំងពីរក៏នឹងធ្វើជាសាក្សីនៅក្នុងពិធីចុះហត្ថលេខាលើឯកសារស្តីពីកិច្ចសហប្រតិបត្តិការទ្វេភាគីលើវិស័យផ្សេងៗមួយចំនួនផងដែរ។
គួរជម្រាបថា ទំហំពាណិជ្ជកម្មទ្វេភាគីរវាងប្រទេសកម្ពុជា-ថៃ នៅត្រីមាសទី១ ឆ្នាំ២០២៥ សម្រេចបានជាង១ពាន់លានដុល្លារកើនឡើង២,២% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះកម្ពុជា នាំចេញទៅថៃ មានជាង២៥៥លានដុល្លារ ថយចុះជាង១០% ខណៈកម្ពុជា នាំចូលពីថៃវិញមានទំហំជាង៨៩៣លានដុល្លារកើនឡើង៦,៧%។ នេះបើយោងតាមរបាយការណ៍របស់អគ្គនាយកដ្ឋានគយនឹងរដ្ឋាករ៕
