ពាណិជ្ជករព្រមានថា រោងចក្រជាច្រើននឹងបង្ខំចិត្តបញ្ឈប់ការងារកម្មករ បើថៃ បន្តបិទព្រំដែនជាមួយកម្ពុជា
ការដោះដូរពាណិជ្ជកម្មប្រចាំថ្ងៃនៅច្រកព្រំដែន បានហានលើក (Ban Hat Lek) ជាប់នឹងច្រកព្រំដែនចាំយាមកម្ពុជា នៅក្នុងខេត្តកោះកុងមួយថ្ងៃមានទំហំរហូត…
ប្រព័ន្ធធនាគាររបស់ប្រទេសថៃ បានជួបបញ្ហាដ៏ធ្ងន់ធ្ងរ ដោយគណនីធនាគារនានារបស់អតិថិជនត្រូវបានបង្កក ដែលបង្កឱ្យមានភាពចលាចលពេញប្រទេស ហើយដើម្បីស្រាយចម្ងល់នេះ ធនាគារកណ្តាលថៃ បានកំណត់មូលហេតុសំខាន់ៗ២ ដែលនាំឱ្យប្រព័ន្ធធនាគារថៃ មានបញ្ហា Error ហើយបានបញ្ជាឱ្យធនាគារពាណិជ្ជនានាជួយពន្លឿនការដោះស្រាយជូនអតិថិជនដែលរងផលប៉ះពាល់ និងកែលម្អដំណើរការរបស់ពួកគេ។
ធនាគារកណ្តាលថៃ បានពន្យល់ថា ប្រព័ន្ធធនាគារថៃ មានបញ្ហា Error ដោយសារកត្តាសំខាន់ៗ២ដាច់ដោយឡែកពីគ្នា ដោយបញ្ហាទី១ គឺដោយសារការបង្ហាញតារាងតុល្យការមិនត្រឹមត្រូវនៅលើគណនីប្រាក់បញ្ញើមួយចំនួន ឬនិយាយឱ្យងាយស្ដាប់មានន័យថា តួលេខដែលបង្ហាញនៅលើគណនីប្រាក់បញ្ញើទាំងនោះមានភាពខុសប្រក្រតី ហើយបញ្ហាទី២ គឺទាក់ទងនឹងការស៊ើបអង្កេតរបស់ប៉ូលិសដែលឈានទៅដល់ការបញ្ជាឱ្យធនាគារនានាបង្កកគណនីដែលគួរឱ្យសង្ស័យ។
ធនាគារកណ្ដាលថៃ បានណែនាំឱ្យធនាគារពាណិជ្ជនានា ផ្តល់ការពន្យល់កាន់តែច្បាស់ដល់អតិថិជននៅក្នុងករណីបែបនេះ ដោយទទួលស្គាល់ថា ដំណើរការនៃការបង្កក និងការដោះស្រាយគណនីធនាគារមានបញ្ហា អាចជះផលប៉ះពាល់ដល់អតិថិជនល្អ ដែលគ្មានកំហុស ហើយថា ខ្លួនកំពុងសហការជាមួយធនាគារពាណិជ្ជនានា និងផ្នែកអនុវត្តច្បាប់ ដើម្បីកែលម្អប្រព័ន្ធធនាគារឱ្យកាន់តែប្រសើរ។
ធនាគារកណ្ថាលថៃ បាននិយាយថា គោលដៅនៃការរឹតបន្តឹងការត្រួតពិនិត្យប្រព័ន្ធធានាគារ គឺដើម្បីប្រយុទ្ធប្រឆាំងការឆបោក និងការពារជនរងគ្រោះឱ្យកាន់តែមានប្រសិទ្ធភាព ខណៈដែលខ្លួនកំពុងពន្លឿនដំណើរការដោះស្រាយជូនអតិថិជនល្អៗ ដែលមិនជាប់ពាក់ព័ន្ធ។ ធនាគារកណ្ដាលថៃ បានជំរុញឱ្យសាធារណជន ដែលជួបបញ្ហាមិនទាន់បានដោះស្រាយជាមួយគ្រឹះស្ថានធនាគាររបស់ពួកគេ ប្រញាប់ទំនាក់ទំនងទៅកាន់មជ្ឈមណ្ឌលទទួលពាក្យ
បណ្តឹងរបស់ខ្លួន៕
ដោយ: តែម សុខុម
