ទីផ្សារអលនទ្រព្យនៅថៃបានដាំក្បាលចុះយ៉ាងគំហុកនៅក្នុងខែសីហា និងអាចបន្តធ្លាក់ចុះបន្ថែមទៀត

លោក អ៊ូថៃ អ៊ូថៃសាងស៊ុក (Uthai Uthaisangsuk) ប្រធានក្រុមហ៊ុនអភិវឌ្ឍន៍អចលនទ្រព្យមួយនៅប្រទេសថៃបាននិយាយថា ទីផ្សារលំនៅឋាននៅថៃទំនងជាគ្មានភាពប្រសើរឡើងវិញនោះទេនៅក្នុងឆមាសទី២ឆ្នាំនេះ បើធៀបឆមាសទី១ ដោយលោកបន្ថែមថា ការឡើងចុះរបស់វិស័យអចលនទ្រព្យ គឺពឹងអាស្រ័យលើកំណើនសេដ្ឋកិច្ចជាតិ។ ប្រសិនបើកំណើនសេដ្ឋកិច្ចកើនឡើង វិស័យនេះ ក៏នឹងកើនឡើង ប៉ុន្តែបើសេដ្ឋកិច្ចធ្លាក់ចុះ វាក៏នឹងទាញទម្លាក់វិស័យនេះទៅជាមួយគ្នាផងដែរ។

កាលពីឆមាសទីមួយឆ្នាំនេះ ផលិតផលក្នុងស្រុកសរុបរបស់ថៃបានកើនឡើងជិត៣% ប៉ុន្តែអ្នកវិភាគជាច្រើនបានចាប់ផ្ដើមព្យាករអំពីកំណើនយឺតដោយសារបញ្ហាមួយចំនួនដូចជាការដំឡើងពន្ធរបស់សហរដ្ឋអាម៉េរិក ដែលបានធ្វើឱ្យប៉ះពាល់ដល់ការនាំចេញ និងការធ្លាក់ចុះវិស័យទេសចរណ៍ បើទោះបីជារដូវកាលទេសចរណ៍ខ្ពស់នៅថៃ បានចូលមកដល់នៅឆមាសទីពីរនេះក៏ដោយ។

ដោយហេតុតែមានព័ត៌មានអវិជ្ជមាន ជាពិសេសការដំឡើងពន្ធរបស់សហរដ្ឋអាម៉េរិក និងការធ្លាក់ចុះវិស័យទេសចរណ៍បែបនេះ ដូច្នេះហើយមនុស្សជាច្រើនរំពឹងថា កំណើន GDP នៅឆមាសទីពីរនឹងធ្លាក់ចុះក្រោម២% ដែលអាចដល់កម្រិតទាប១% ហើយវានឹងអូសទាញកំណើន GDP ពេញមួយឆ្នាំនេះឱ្យធ្លាក់ចុះមកនៅត្រឹមប្រហែល២%។

យ៉ាងណាក៏ដោយ សម្រាប់វិស័យខុនដូ គឺមានដំណើរការល្អនៅក្នុងឆមាសទីមួយ ជាពិសេសគម្រោងខុនដូស្ថិតនៅទីតាំង ដែលមានតម្រូវការខ្លាំងពីជនបរទេស។ យ៉ាងណាមិញ នៅក្នុងទីក្រុងប៉ាតាយ៉ា ដែលជាតំបន់ទេសចរណ៍ដ៏សំខាន់មួយរបស់ថៃ ក្រុមហ៊ុនអភិវឌ្ឍន៍លំនៅឋាន Sansiri បានលក់ផ្ទះខុនដូដាច់អស់នៅក្នុងគម្រោងថ្មីមួយកាលពីត្រីមាសទីមួយដោយខុនដូពាក់កណ្ដាលត្រូវបានលក់ឱ្យជនបរទេស៕

ដោយ៖ សុខ មង្គល