លោក ថាក់ស៊ីន ស្នើឱ្យរដ្ឋាភិបាលថៃ បង្កើតទិដ្ឋាការមាស និងដំឡើងថ្លៃធ្វើដំណើរដើម្បីបង្កើនសេដ្ឋកិច្ច

អតីតនាយករដ្ឋមន្ត្រីថៃ ដ៏មានឥទ្ធិពល លោក ថាក់ស៊ីន ស៊ីណាវ៉ាត្រា ស្នើឱ្យរដ្ឋាភិបាលថៃ បង្កើតឱ្យមានទិដ្ឋាការមាស ដើម្បីទាក់ទាញអ្នកមានទ្រព្យធនមកកាន់ប្រទេសថៃ សំដៅជួយជំរុញការវិនិយោគ និងសេដ្ឋកិច្ចថៃ ដែលកំពុងដាំក្បាលចុះ។ លោកជឿជាក់ថា តាមរយៈគម្រោងទិដ្ឋាការមាសនេះ វានឹងជួយជំរុញសេដ្ឋកិច្ចថៃ ឱ្យឈានដល់៥០០ពាន់លានដុល្លារ ក៏ដូចជាជួយកាត់បន្ថយបំណុលសាធារណៈ ជំរុញការប្រើប្រាស់ក្នុងស្រុក និងជួយជំរុញទីផ្សារ និងតម្លៃអចលនទ្រព្យ។

សេដ្ឋកិច្ចរបស់ប្រទេសថៃ ដែលពឹងផ្អែកខ្លាំងលើការនាំចេញ និងទេសចរណ៍ បានកើនឡើងជាមធ្យមក្រោម២% ក្នុងរយៈពេលមួយទសវត្សរ៍កន្លងមកនេះ ដោយផលិតផលក្នុងស្រុកសរុបត្រូវគេរំពឹងថាទំនងជានឹងកើនឡើងចន្លោះពី១,៣% ទៅ២,៣% នៅឆ្នាំ២០២៥ ដែលជាប់គាំងដោយបំណុលគ្រួសារខ្ពស់ និងការថយចុះចំនួនភ្ញៀវទេសចរ ខណៈសេដ្ឋកិច្ចក៏មានហានិភ័យនៃការយកពន្ធ៣៦% ពីសហរដ្ឋអាម៉េរិក ដែលជាទីផ្សារនាំចេញធំបំផុតរបស់ប្រទេសនេះផងដែរ។

ក្រៅពីការបង្កើតគម្រោងទិដ្ឋាការមាសនេះ លោក ថាក់ស៊ីន ក៏បានស្នើឱ្យអាកាសយានដ្ឋានប្រទេសថៃ (AOT) បង្កើនតម្លៃសេវាអ្នកដំណើររបស់ខ្លួនអតិបរមាជិត១០ដុល្លារក្នុងអ្នកដំណើរម្នាក់ដើម្បីបង្កើតប្រាក់ចំណេញបន្ថែមជាង១លានដុល្លារក្នុងមួយឆ្នាំ ដែលតួលេខនេះនឹងបន្ថែម៤០% ពីកម្រិតប្រាក់ចំណេញបច្ចុប្បន្ន។

លោកបាននិយាយថា អាកាសយានដ្ឋានប្រទេសថៃ គួរតែជាអ្នកជំរុញសេដ្ឋកិច្ចពាក់ព័ន្ធនឹងការធ្វើជាមជ្ឈមណ្ឌលអាកាសចរណ៍ មជ្ឈមណ្ឌលដឹកទំនិញ និងមជ្ឈមណ្ឌលថែទាំយន្តហោះ ដែលអាចជំរុញសេដ្ឋកិច្ចឱ្យកាន់តែខ្លាំងឡើង និងជួយឱ្យថៃ ក្លាយជាមជ្ឈមណ្ឌលអាកាសចរណ៍នៅក្នុងតំបន់អាស៊ីអាគ្នេយ៍ ព្រមទាំងជំរុញអាជីវកម្មដឹកជញ្ជូនទំនិញ និងការថែទាំអាកាសចរណ៍ផងដែរ៕

ដោយ៖ សុខ មង្គល