ក្រៅពីប្រាសាទតាមាន់ធំ កងទ័ពថៃក៏បានបើកឲ្យពលរដ្ឋខ្លួនចូលទស្សនានៅប្រាសាទតាក្របី សម្រាប់ថ្ងៃសង្ក្រាន្តចូលឆ្នាំថ្មីនេះ ដែលជាការបើកឱ្យចូលទស្សនាលើកដំបូងបន្ទាប់ពីការប៉ះទង្គិចគ្នាតាមព្រំដែនកន្លងមក។ បើតាមកាសែតថៃ Khaosod ការចូលទស្សនាត្រូវបានអនុញ្ញាតចាប់ពីថ្ងៃទី១៣-១៦ ខែមេសា។
បើតាមបណ្ឌិត គិន ភា សកម្មភាពនេះ គឺជាយុទ្ធសាស្ត្រលេបត្របាក់ទឹកដីខ្មែរបន្តិចម្តងៗដូចជាការហាន់សាច់ក្រក (Salami Slicing Strategy) និងធ្វើសកម្មភាពតាមទំនើងចិត្តដើម្បីបង្ហាញពីការគ្រប់គ្រងជាក់ស្តែង បង្កើតភាពជាម្ចាស់ និងប្រែក្លាយអង្ករឱ្យទៅជាបាយ (Faits Accomplis) នៅលើដីជាក់ស្ដែង ដើម្បីឈានទៅរកការកាត់យកទឹកដីខ្មែរទាំងស្រុង (Annexation) ដោយឥតអៀនខ្មាស និងមិនគោរពច្បាប់អន្តរជាតិ។
អ្នកជំនាញភូមិសាស្ត្រនយោបាយរូបនេះ គូសបញ្ជាក់ទៀតថា «រាល់សកម្មភាពដែលភាគីថៃកំពុងធ្វើនៅទីនោះ ប្រៀបដូចជាការយកកាំបិតដ៏មុតស្រួច មកចាក់ទម្លុះចំកណ្ដាលបេះដូងនិងកំពុងអារកាត់អវយវៈកូនខ្មែរទាំងរស់។ នេះគឺជាការឈឺចាប់ដែលមិនអាចពិពណ៌នាបាន។ គេមិនត្រឹមតែរំលោភទឹកដីខ្មែរដោយប្រើកម្លាំងយោធានិងរំលោភច្បាប់អន្តរជាតិប៉ុណ្ណោះទេ ប៉ុន្តែថែមទាំងជាការប្រមាថដ៏ឈឺចាប់លើអត្តសញ្ញាណជាតិនិងបេតិកភណ្ឌដ៏បរិសុទ្ធរបស់យើង ហើយមានចេតនាបង្កឱ្យមានការបែកបាក់ផ្ទៃក្នុងក្នុងចំណោមជាតិសាសន៍យើង ធ្វើឱ្យមានគម្លាតទំនុកចិត្តរវាងរដ្ឋនិងរាស្ត្រ និងធ្វើឱ្យរាស្ត្រខ្មែរយល់ថា រាជរដ្ឋាភិបាលរបស់ខ្លួនមានភាពទន់ខ្សោយចំពោះមុខសត្រូវឈ្លានពាន។»
លោកបណ្ឌិត គិន ភា បានជំរុញឱ្យពលរដ្ឋខ្មែរ ត្រូវតែប្រែក្លាយការឈឺចាប់នាពេលនេះឱ្យទៅជាកម្លាំង គឺកម្លាំងនៃការកែទម្រង់ កម្លាំងនៃការរួបរួម និងកម្លាំងនៃការការពារ។ លោកបន្ថែមថា «មានតែយើងខ្លាំងទេ ទើបយើងអាចការពារអធិបតេយ្យនិងបូរណភាពទឹកដីយើងពីការប្រមាថនិងការឈ្លានពានបាន។ យើងត្រូវតែមានភាពក្លាហានក្នុងការកែទម្រង់ស៊ីជម្រៅដ៏មុតស្រួចពិតប្រាកដ ហ៊ានវះកាត់សាច់ស្អុយពិតប្រាកដ និងត្រូវតែលុបបំបាត់អំពើពុករលួយឱ្យខាងតែបាន ដើម្បីសាងជាតិយើងឱ្យខ្លាំងពិតប្រាកដ គឺយោធាខ្លាំង ការទូតខ្លាំង សេដ្ឋកិច្ចមានភាពធន់និងឯករាជ្យ នយោបាយមានស្ថិរភាព សង្គមមានយុត្តិធម៌ពិតប្រាកដ ច្បាប់ជាបង្អែក និងទំនាក់ទំនងរវាងរដ្ឋនិងពលរដ្ឋផ្អែកលើការជឿទុកចិត្តនិងឯកភាពជាតិដ៏រឹងមាំ ជាពិសេស មនុស្សខ្មែរគ្រប់រូបត្រូវតែខ្លាំង។ នៅពេលដែលមនុស្សខ្មែរគ្រប់រូបខ្លាំង និងមានទឹកចិត្តស្មោះត្រង់ចំពោះជាតិមាតុភូមិ នោះកិត្យានុភាពជាតិនឹងត្រូវលើកកម្ពស់ឱ្យខ្ពស់ត្រដែតលើឆាកអន្តរជាតិ និងជាខែលការពារជាតិមាតុភូមិឱ្យនៅគង់វង្ស រួចផុតពីការប្រមាថនិងការឈ្លានពានគ្រប់ទម្រង់៕»
