គ្រោះទឹកជំនន់ដ៏មហន្តរាយមិនធូរស្រាលផង អ្នកជំនាញព្រមានថា ថៃនឹងរងឥទ្ធិពលពីព្យុះទីហ្វុងចំនួនពីរបន្ថែមទៀត

បើយោងតាមការចុះផ្សាយរបស់សារព័ត៌មាន the Nation គិតត្រឹមថ្ងៃទី៣០ វិច្ឆិកា អ្នកស្លាប់ដោយសារគ្រោះទឹកជំនន់នៅថៃ បានកើនឡើងដល់ជាង១៦០នាក់ហើយ។

​​ព្យុះទីហ្វុង កូតូ និងសេនយ៉ា ត្រូវបានគេរាយការណ៍ថា កំពុងរួមបញ្ចូលគ្នាជាព្យុះតែមួយនៅក្នុងសមុទ្រចិន ខាងត្បូង ដែលបាតុភូតបែបនេះវាអាចនឹងធ្វើឱ្យមានភ្លៀងធ្លាក់ខ្លាំងនៅតំបន់ភាគខាងកើត និងភាគខាងត្បូងប្រទេសថៃ ជាពិសេសរវាងថ្ងៃទី២ និងទី៣ ខែធ្នូ ឆ្នាំ២០២៥។ លោក ឆាវ៉ានីត ឆានថារ៉ាត (Chawalit Chantharat) អ្នកជំនាញខាងគ្រប់គ្រងមួយរូបបានព្រមានថា ការវិវត្តរបស់ព្យុះទាំងពីរនេះ វានឹងបង្កផលប៉ះពាល់ធ្ងន់ធ្ងរដល់តំបន់ឆ្នេររបស់ប្រទេសថៃ ដែលកំពុងរង​ការវាយប្រហារដោយសារគ្រោះទឹកជំនន់ស្រាប់ហើយនោះ។

អ្នកជំនាញរូបនេះបានអះអាងថា ទោះបីព្យុះនេះមិនវាយប្រហារដោយផ្ទាល់លើប្រទេសថៃ តែអន្តរកម្មរបស់វានឹងទាញយកសំណើមយ៉ាងច្រើនចូលទៅក្នុងប្រទេស ដែលជំរុញឱ្យមានភ្លៀងធ្លាក់ខ្លាំងនៅតំបន់ភាគខាងកើត និងភាគខាងត្បូងប្រទេសថៃ នៅដើមខែធ្នូ នេះ។

ព្យុះកូតូ ដែលជាព្យុះទីហ្វុងទី២៧ នៅឆ្នាំនេះបានកកើតឡើងនៅជិតសមុទ្រហ្វីលីពីន នៅថ្ងៃទី២៥ ខែវិច្ឆិកា មុនពេលធ្វើដំណើរឆ្ពោះទៅសមុទ្រចិន ខាងត្បូង ក៏ប៉ះអន្តរកម្មនឹងខ្យល់ត្រជាក់ពីប្រទេសចិន ក៏ធ្វើឱ្យវាចុះខ្សោយទៅជាព្យុះត្រូពិច ប៉ុន្តែវាអាចរួមបញ្ចូលនឹងព្យុះ ដែលកើតពីសម្ពាធនៅសមុទ្រចិត្តខាងត្បូង សេនយ៉ា ដែលអាចធ្វើឲ្យមានជំនន់ទឹកភ្លៀងគំរាមកំហែងតំបន់ភាគខាងត្បូង និងឆ្នេរភាគខាងកើតរបស់ថៃ ជាថ្មីម្តងទៀត។

បើតាមការអះអាងរបស់អាជ្ញាធរថៃ គិតត្រឹមថ្ងៃទី៣០ ខែវិច្ឆិកា ខ្លួនបានរកឃើញសាកសពជនរងគ្រោះដោយទឹកជំនន់នៅភាគខាងត្បូង ប្រទេសថៃ ជាង១៦០នាក់ហើយ។

បច្ចុប្បន្នថៃ ជាប់ចំណាត់ថ្នាក់លេខ១៧ ជាប្រទេសដែលមានហានិភ័យអាកាសធាតុសកលខ្ពស់ ដែលជំរុញឱ្យរដ្ឋាភិបាលថៃ ត្រូវដាក់ផែនការ និងធ្វើសកម្មភាពឱ្យសកម្មជាងមុន ដើម្បីដោះស្រាយបញ្ហាអាកាសធាតុធ្ងន់ធ្ងរបន្ថែមទៀត។ បើតាមការគូសបញ្ជាក់របស់លោកបណ្ឌិត ភិរុណ សៃយ៉ាសិទ្ធិផានិច (Phirun Saiyasitpanich) អគ្គនាយកនៃនាយកដ្ឋានប្រែប្រួលអាកាសធាតុ និងបរិស្ថាន នៃក្រសួងធនធានធម្មជាតិ និងបរិស្ថាន កាលពីឆ្នាំ២០២២ ថៃ ជាប់ចំណាត់ថ្នាក់លេខ៧២ ប៉ុន្តែនៅឆ្នាំ២០២៥ នេះ ថៃ បានក្លាយជាប្រទេសទី១៧ ក្នុងចំណោមប្រទេសដែលមានសន្ទស្សន៍ហានិភ័យអាកាសធាតុអាក្រក់បំផុតនៅលើពិភពលោក៕

ដោយៈ សរ សុជាតិ