លោក ដូណាល់ ត្រាំ និយាយថា សេចក្ដីសម្រេចលើជោគវាសនារបស់ប្រធានធនាគារកណ្ដាលអាម៉េរិក នឹងធ្វើឡើងឆាប់ៗនេះ

ប្រធានាធិបតីទី៤៧របស់សហរដ្ឋអាម៉េរិក លោក ដូណាល់ ត្រាំ បានថ្លែងប្រាប់ក្រុមអ្នកយកព័ត៌មាននៅលើយន្តហោះ Air Force One ថា សេចក្ដីសម្រេចដែលអាចជះឥទ្ធិពលលើពិភពលោកនេះនឹងត្រូវធ្វើឡើងក្នុងពេលឆាប់ៗនេះ។ នៅពេលក្រុមអ្នកសារព័ត៌មានសាកសួរ ជាពិសេសអំពីអតីតប្រធានធនាគារកណ្ដាលអាម៉េរិកលោក ខេវិន វ៉ស (Kevin Warsh) លោក ដូណាល់ ត្រាំ បានលើកឡើងថា លោក ខេវិន វ៉ស គឺជាជម្រើសបេក្ខភាពដ៏ល្អដែលស្ថិតក្នុងការពិចារណា។

សូមបញ្ជាក់ថា លោក ខេវិន វ៉ស (Kevin Warsh) ត្រូវបានគេមើលឃើញថា ជាបេក្ខភាពឈានមុខគេដែលលោក ដូណាល់ ត្រាំ ជ្រើសរើសជាប្រធានធនាគាកណ្ដាលអាម៉េរិក​បន្ទាប់ជំនួសលោក ជើរ៉ូម ផៅវែល (Jerome Powell)។ កាលពីព្រឹកថ្ងៃទី៦ ខែមិថុនា លោក ដូណាល់ ត្រាំ បាននិយាយថា ធនាគារកណ្ដាលអាម៉េរិក គួរតែបញ្ចុះអត្រាការប្រាក់ក្នុងរង្វង់១%ពេញ ហើយបានបញ្ជាក់ទស្សនៈរបស់លោកជាថ្មីថា លោក ជើរ៉ូម ផៅវែល (Jerome Powell) យឺតយ៉ាវណាស់នៅក្នុងការបញ្ចុះអត្រាការប្រាក់។

គួររំឭកថា លោក ដូណាល់ ត្រាំ បានស្តីបន្ទោសលោក ជើរ៉ូម ផៅវែល ម្តងហើយម្តងទៀតចំពោះការមិនបញ្ចុះអត្រាការប្រាក់ដូចដែលលោកចង់បាន។ លោក ដូណាល់ ត្រាំ និងលោក ជើរ៉ូម ផៅវែល បានជួបគ្នាទល់មុខកាលពីសប្ដាហ៍មុន ដោយលោក ដូណាល់ ត្រាំ បានប្រាប់លោក ជើរ៉ូម ផៅវែល ថា ការមិនបញ្ចុះអត្រាការប្រាក់ គឺជាកំហុសមួយដែលលោកបានប្រព្រឹត្ត៕

ដោយ: តែម សុខុម