ត្រឹម១ខែ វៀតណាម រកចំណូលបានរហូតដល់ជិត១ពាន់លានដុល្លារពីនាំចេញទុរេនទៅចិន
ទុរេនវៀតណាម ដែលគយចិន បានរកឃើញមានផ្ទុកសារធាតុគីមី ដែលអាចធ្វើឱ្យប៉ះពាល់ដល់សុខភាពកន្លងមកកំពុងវិលទៅរកប្រក្រតីភាពឡើងវិញក្នុងការនាំចេញទៅក…
ប្រទេសហ្វីលីពីន និងចិន បានប៉ះទង្គិចគ្នាជារឿយៗនៅតំបន់មានជម្លោះក្នុងសមុទ្រចិនខាងត្បូង ដែលទីក្រុងប៉េកាំង បានទាមទារយកស្ទើរតែទាំងស្រុង ទោះជាមានសេចក្តីសម្រេចជាអន្តរជាតិថា ការទាមទាររបស់ទីក្រុងប៉េកាំង មិនមានមូលដ្ឋានច្បាប់យ៉ាណាក៏ដោយ។ ដើម្បីត្រៀមទប់ទល់នឹងការយាយីរបស់ចិន ប្រទេសហ្វីលីពីន បានចុះហត្ថលេខាលើកិច្ចព្រមព្រៀងស្ដីពីការផ្លាស់ប្តូរកងកម្លាំងជាមួយកាណាដា ដើម្បីពង្រឹងសមត្ថភាពកងកម្លាំងរបស់ខ្លួន។
តាមរយៈកិច្ចព្រមព្រៀងនេះ នឹងអនុញ្ញាតឱ្យកងទ័ពរបស់កាណាដា អាចចូលរួមក្នុងលំហាត់យោធារួមគ្នាជាមួយកងកម្លាំងហ្វីលីពីន។ ការចុះកិច្ចព្រមព្រៀងនេះធ្វើឡើងក្រោយកងទ័ពជើងទឹកកាណាដា បានចាប់ផ្តើមចូលរួមល្បាតនៅក្នុងតំបន់មានជម្លោះជាមួយសមភាគីអាម៉េរិក អូស្ត្រាលី ជប៉ុន និងហ្វីលីពីនកាលពីឆ្នាំមុន។
រដ្ឋមន្ត្រីក្រសួងការពារជាតិកាណាដាលោក ដេវីដ ម៉េកហ្គីនធី (David McGuinty) បាននិយាយថា កិច្ចព្រមព្រៀងនេះនឹងពង្រឹងទំនាក់ទំនងកាន់តែស៊ីជម្រៅជាមួយយោធាហ្វីលីពីន ដែលជាយុទ្ធសាស្ត្ររបស់ទីក្រុងអូតាវ៉ាក្នុងការពង្រឹងឥទ្ធិពលនៅតំបន់អាស៊ីប៉ាស៊ីហ្វិក។ លោកបានបន្តថា កាណាដានឹងឈានទៅមុខលើវិស័យបណ្តុះបណ្តាល ការផ្លាស់ប្តូររវាងមហាវិទ្យាល័យយោធា ការចែករំលែកព័ត៌មាន និងការយល់ដឹងអំពីសន្តិសុខតាមអ៊ីនធឺណិតជាមួយហ្វីលីពីន ហើយសង្ឃឹមថា ខ្លួននឹងបានចូលរួមក្នុងសមយុទ្ធយោធាប្រចាំឆ្នាំជាមួយហ្វីលីពីននៅឆ្នាំក្រោយ៕
ដោយ៖ សុខ មង្គល
