ក្រុមហ៊ុន វិរៈ ប៊ុនថាំ រួមចំណែកឧបត្ថម្ភគាំទ្រដល់គម្រោង «ផ្ទាំងគំនូរសិល្បៈដើម្បីសន្តិភាពលើកទី២» នៅភ្នំពេញ

ផ្ទាំងគំនូរខ្នាតធំនេះ មានកម្ពស់ ៥ ម៉ែត្រ និងប្រវែងរហូតដល់ ៣៥ ម៉ែត្រ ដែលមានទំហំវែងជាងផ្ទាំងគំនូរសិល្បៈដើម្បីសន្តិភាពលើកទី១ នៅខេត្តសៀមរាប ចំនួន ៥ ម៉ែត្រ។

លោក តាន់ គឹមសួរ ប្រធានគម្រោងសិល្បៈដើម្បីសន្តិភាព បានបញ្ជាក់ថា រហូតមកដល់ពេលនេះ មានវិចិត្រករជាង ១០០ នាក់ បានចុះឈ្មោះ និងទាក់ទងមកផ្ទាល់ដើម្បីចូលរួមចំណែកក្នុងស្នាដៃសិល្បៈមួយនេះ។ គោលបំណងសំខាន់នៃគំនូរនេះ គឺដើម្បីបង្ហាញពិភពលោកអំពីការឈឺចាប់ខ្លោចផ្សារបស់កម្ពុជា ដែលបណ្តាលមកពីសង្គ្រាមឈ្លានពានរបស់ប្រទេសថៃ និងដើម្បីលើកកម្ពស់ស្មារតីស្នេហាជាតិ សាមគ្គីភាព ក៏ដូចជាការតស៊ូរបស់យុទ្ធជន និងប្រជាពលរដ្ឋខ្មែរគ្រប់ជំនាន់។

ព្រឹត្តិការណ៍សិល្បៈនេះ បាននិងកំពុងទាក់ទាញការចាប់អារម្មណ៍យ៉ាងខ្លាំងពីសាធារណជនជាតិ និងអន្តរជាតិ រួមទាំងមានការចូលរួមឧបត្ថម្ភពីវិស័យឯកជនជាច្រើនផងដែរ។ ក្នុងនោះ ក្រុមហ៊ុន វិរៈ ប៊ុនថាំ បានចូលរួមឧបត្ថម្ភទឹកប្រាក់ចំនួន ២,៤០០ ដុល្លារ ព្រមទាំងផ្តល់ការគាំទ្រលើផ្នែកស្នាក់នៅ និងមធ្យោបាយធ្វើដំណើរផ្សេងៗ ដើម្បីសម្រួលដល់កិច្ចការងាររបស់ក្រុមវិចិត្រករ។

បច្ចុប្បន្ន សកម្មភាពគូរគំនូរនេះ កំពុងដំណើរការយ៉ាងសកម្មនៅទីតាំង សួនច្បារមុខវត្តបុទុមវតី។ បើតាមលោក តាន់ គឹមសួរ បន្ទាប់ពីបញ្ចប់ការងារគូរ ផ្ទាំងគំនូរនេះនឹងត្រូវបាញ់ថ្នាំការពារកម្ដៅ និងសំណើម រួចដាក់តាំងបង្ហាញនៅទីតាំងដដែលនេះក្នុងរយៈពេល ២ ខែ ដើម្បីទុកជូនប្រជាពលរដ្ឋ និងភ្ញៀវទេសចរបានទស្សនា និងឈ្វេងយល់ពីអត្ថន័យនៃស្នាដៃសិល្បៈដ៏អស្ចារ្យមួយនេះ៕