សម្ដីអនុរដ្ឋមន្ត្រីការពារជាតិថៃ ដែលថា “យោធិនកម្ពុជាទាំង១៨នាក់ មិនចង់វិលមកស្រុកកំណើតវិញ ព្រោះសប្បាយរស់នៅក្នុងទឹកដីថៃ” ឆ្លុះបញ្ចាំងឱ្យឃើញយ៉ាងច្បាស់ពីការទាល់ច្រកនៃក្រឡាការទូតរបស់ថៃ

ប៉ុន្ដែ ជារឿងមួយគួរឱ្យហូសចិត្ត ដែលកាលពីថ្ងៃទី ៩ ខែវិច្ឆិកា ម្សិលមិញនេះ អនុរដ្ឋមន្ត្រីការពារជាតិរបស់ថៃម្នាក់ បានចេញមកនិយាយ​ដោយមិនសមហេតុផលថា “មានយោធិនខ្លះ នៅក្នុងចំណោមយោធិនទាំង​១៨នាក់ ដែលបានចាប់ខ្លួននោះ មិនចង់វិលត្រឡប់មកកម្ពុជាវិញឡើយ ព្រោះថា ពួកគេសប្បាយរីករាយ​នៅក្នុង​ទឹកដីនៃប្រទេសថៃ”។

ការលើកឡើងរបស់មន្ត្រីជាន់ខ្ពស់ថៃរូបនេះ សូម្បីតែកូនក្មេងក៏ស្ដាប់ទៅហាក់អស់សំណើចដែរ ព្រោះ ជាធម្មតាមនុស្ស ដែលត្រូវគេចាប់ឃុំឃាំង ពង្រាត់ចេញឆ្ងាយពី ឪពុកម្ដាយ, បងប្អូន, ប្រពន្ធកូន រមែងសញ្ជឹងគិតគ្រប់វិនាទី ដើម្បីបានវិលត្រឡប់មកជួបជុំគ្នាវិញ។ ប៉ុន្ដែ ហេតុអ្វី ក៏អនុរដ្ឋមន្ត្រីការពារជាតិថៃ Adul Boonthamcharoen ដែលជាអ្នកកាន់ការធំក្នុងជួររាជរដ្ឋាភិបាល បែរជានិយាយឡើង រាក់កំផែលយ៉ាងដូច្នេះ?

សម្ដីរបស់អនុរដ្ឋមន្ត្រីការពារជាតិថៃនេះ ទំនងជាប្រើប្រាស់បានដើម្បីបោកបញ្ឆោតជនជាតិថៃខ្លួនឯង​ឱ្យជឿលើ​នយោបាយ ដែលគ្មានគោលដៅ​របស់ខ្លួនតែប៉ុណ្ណោះ ហើយវាក៏ឆ្លុះបញ្ចាំងឱ្យឃើញពី​ភាពទាល់ច្រក នៃក្រឡាការទូតរបស់ប្រទេសថៃ ដែលចង់ឬមិនចង់ ទីក្រុងបាងកក នឹងត្រូវតែដោះលែងយោធិនទាំង ១៨នាក់ ស្ថិតក្រោមក្រសែភ្នែក និងការចង្អុលមុខឥតដាក់ ពីអន្តរជាតិ។

យោងតាមកាសែតក្នុងស្រុកថៃ បានផ្សាយថ្មីៗនេះថា ការដោះលែងយោធិនកម្ពុជាទាំង ១៨នាក់ អាចនឹងត្រូវធ្វើឡើងនៅថ្ងៃទី ១២ ខែវិច្ឆិកា ពោលគឺពុធសប្ដាហ៍នេះ ខណៈយោធាថៃ ទោះបីជា យោធាថៃនៅតែ​បន្ដ​គោលជំហរតឹងរ៉ឹងថា ដំណើរការ​ដោះលែងនេះ នឹងត្រូវបាន​វាយតម្លៃរួមគ្នា​ដោយក្រុមអ្នកសង្កេត​ការណ៍អាស៊ាន (AOT) រួមជាមួយនឹងរដ្ឋាភិបាលថៃ និងកម្ពុជាក្ដី។ ប្រទេសថៃ ទាមទារឱ្យកម្ពុជាបាន​អនុវត្តបានបំពេញបានពេញលេញ​នូវលក្ខខណ្ឌចំនួន៤ រួមមាន៖ ការដកអាវុធធុនធ្ងន់ចេញពីតំបន់ព្រំដែន, ការសម្អាតមីននៅតាមតំបន់ព្រំដែន, ការប្រយុទ្ធប្រឆាំងនឹងបទល្មើសឆបោកតាមប្រព័ន្ធអនឡាញតាមព្រំដែន និងការគ្រប់គ្រងតំបន់ព្រំដែន។

ទោះយ៉ាងណា សហរដ្ឋអាម៉េរិក ក្រោមការចង្អុលបង្ហាញពីរដ្ឋបាលលោក ដូណាល់ ត្រាំ ដែលជាសាក្សី នៃការចុះហត្ថលេខាលើសេចក្ដីថ្លែងការណ៍រួម ស្តីពីកិច្ចព្រមព្រៀងសន្តិភាពទីក្រុងគូឡាឡាំពួ រវាងកម្ពុជា និងថៃ បានទទូចឱ្យទីក្រុងបាងកក ត្រូវដោះលែងយោធិនកម្ពុជាទាំង ១៨នាក់ ឱ្យបានឆាប់បំផុត ពោលគឺ​សហរដ្ឋអាម៉េរិកចង់ឱ្យមានការដោះលែងនេះ ភ្លាមៗក្រោយមានការចុះហត្ថលេខាម្ល៉េះ។