អាម៉េរិក ធ្វើឱ្យពិភពលោកមានការភ្ញាក់ផ្អើលជាថ្មី ដោយសម្រេចមិនចូលរួមត្រួតពិនិត្យកំណត់ត្រាសិទ្ធិមនុស្សរបស់អង្គការសហប្រជាជាតិ

អ្នកវិភាគជឿជាក់ថា ការដកខ្លួនរបស់សហរដ្ឋអាម៉េរិកនឹងធ្វើឱ្យកិច្ចប្រឹងប្រែងលើកកម្ពស់សិទ្ធិមនុស្សជាសកលចុះខ្សោយ ខណៈការិយាល័យសិទ្ធិមនុស្សអង្គការសហប្រជាជាតិ បានចាត់ទុកការសម្រេចចិត្តរបស់អាម៉េរិកនេះថា ជារឿងគួរឱ្យសោកស្តាយ។ នេះបើយោងតាមការចុះផ្សាយរបស់សារព័ត៌មានធំៗជាច្រើន។

សហរដ្ឋអាម៉េរិកនឹងមិនចូលរួមក្នុងការត្រួតពិនិត្យលើកំណត់ត្រាសិទ្ធិមនុស្សប្រចាំឆ្នាំរបស់អង្គការសហប្រជាជាតិ ដែលធ្វើឱ្យអ្នកតស៊ូមតិខាងផ្នែកសិទ្ធិមនុស្សមានការគួរឱ្យព្រួយបារម្ភយ៉ាងខ្លាំងពីការចូលរួមជាសកលរបស់ទីក្រុងវ៉ាស៊ីនតោន លើបញ្ហាសិទ្ធិមនុស្ស និងយុត្តិធម៌សង្គម។

ជាទូទៅអង្គការសហប្រជាជាតិ តែងតែចងក្រង និងប្រមូលរបាយការណ៍អំពីស្ថានភាព និងកំណត់ត្រាសិទ្ធិមនុស្សរបស់ប្រទេសជាសមាជិកទាំង១៩៣ ហើយត្រួតពិនិត្យនៅរៀងរាល់៤ឆ្នាំកន្លះ ទៅ៥ឆ្នាំម្តង ប៉ុន្តៃមន្ត្រីក្រសួងការបរទេសសហរដ្ឋអាម៉េរិក បានអះអាងថា សហរដ្ឋអាម៉េរិកនឹងមិនចូលរួមក្នុងយន្តការនេះ ឬបញ្ជូនរបាយការណ៍សិទ្ធិមនុស្ស ដែលត្រូវបញ្ជូននៅក្នុងខែវិច្ឆិកា នោះទេ។ មន្ត្រីការទូតអាម៉េរិក រូបនេះ បានគូសបញ្ជាក់ថា ការសម្រេចចិត្តបែបនេះ គឺអនុវត្តតាមបទបញ្ជាប្រតិបត្តិរបស់ប្រធានាធិបតី ដូណាល់ ត្រាំ ក្នុងគោលបំណងកាត់ផ្តាច់​អាម៉េរិក ចេញពីក្រុមប្រឹក្សាសិទ្ធិមនុស្សរបស់អង្គការសហប្រជាជាតិ។

លោកស្រី រ៉ាវីណា សេមដាសានី (Ravina Shamdasani) អ្នកនាំពាក្យការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស បានបង្ហាញការសោកស្តាយយ៉ាងខ្លាំងចំពោះការសម្រេចចិត្តរបស់សហរដ្ឋអាម៉េរិកនេះ។ លោកស្រីបានបន្ថែមថា ការចូលរួមប្រកបដោយស្ថាបនាជាមួយក្រុមប្រឹក្សាសិទ្ធិមនុស្សពីសំណាក់សហរដ្ឋអាម៉េរិក និងរដ្ឋទាំងអស់ បានរួមចំណែកយ៉ាងសំខាន់ក្នុងការជួយលើកកម្ពស់ និងការពារសិទ្ធិមនុស្សនៅទូទាំងពិភពលោកក្នុងរយៈពេលជាច្រើនឆ្នាំកន្លងមកនេះ។

ដោយឡែកលោក ម៉ៃឃើល ផូស្ន័រ (Michael Posner) នាយកមជ្ឈមណ្ឌលពាណិជ្ជកម្ម និងសិទ្ធិមនុស្សនៅសាលា Stern School of Business បានចាត់ទុកការដកខ្លួនរបស់អាម៉េរិកនេះ កំពុងធ្វើឱ្យខូចដល់កិច្ចខិតខំប្រឹងប្រែងជាសកលលើការលើកកម្ពស់ការគោរពសិទ្ធិមនុស្សពិភពលោក៕

ដោយៈ សរ សុជាតិ