អាម៉េរិក គ្រោងដកខ្លួនចេញពីអង្គការស្ថិតក្រោមចំណុះរបស់អង្គការសហប្រជាជាតិ (UN) និងអង្គការអន្តរជាតិផ្សេងទៀតសរុបចំនួន៦៦ ហើយអ្វីដែលជាការកត់សម្គាល់អាម៉េរិក នឹងដកខ្លួនចេញពីអនុសញ្ញាក្របខណ្ឌអង្គការសហប្រជាជាតិ ស្តីពីបម្រែបម្រួលអាកាសធាតុ ដែលជាសន្ធិសញ្ញាអាកាសធាតុសកលដ៏សំខាន់ ដែលចងភ្ជាប់ទៅនឹងកិច្ចព្រមព្រៀងទីក្រុងប៉ារីសផងដែរ។ សហរដ្ឋអាម៉េរិកនឹងក្លាយជាប្រទេសដំបូងគេ ដែលដកខ្លួនចេញពីអនុសញ្ញាក្របខណ្ឌអង្គការសហប្រជាជាតិ ស្តីពីការប្រែប្រួលអាកាសធាតុ។
ទន្ទឹមនេះ ទីក្រុងវ៉ាស៊ីនតោន ក៏នឹងដកខ្លួនចេញផងដែរពីអង្គការ UN Women និងមូលនិធិប្រជាជនរបស់អង្គការសហប្រជាជាតិ ដែលធ្វើការផ្តោតលើការធ្វើផែនការគ្រួសារ និងសុខភាពមាតា និងកុមារផងដែរ។ មូលនិធិរបស់សហរដ្ឋអាម៉េរិក សម្រាប់ទីភ្នាក់ងារជាច្រើននៃអង្គការសហប្រជាជាតិ ត្រូវបានកាត់បន្ថយយ៉ាងខ្លាំងរួចទៅហើយ។
សេតវិមានបាននិយាយថា ការសម្រេចចិត្តនេះ គឺជាផ្នែកមួយនៃការពិនិត្យឡើងវិញកាន់តែទូលំទូលាយទៅលើអង្គការអន្តរជាតិ នានា និងមានគោលបំណងបញ្ឈប់ការផ្តល់មូលនិធិរបស់សហរដ្ឋអាម៉េរិក សម្រាប់បណ្ដាអង្គការ ដែលខ្លួននិយាយថា លើកកម្ពស់របៀបវារៈសកលដែលប្រឆាំងនឹងអធិបតេយ្យភាព និងអាទិភាពសេដ្ឋកិច្ចរបស់សហរដ្ឋអាម៉េរិក។
លោក ដូណាល់ ត្រាំ មានការសង្ស័យជាយូរមកហើយចំពោះបណ្ដាស្ថាប័នពហុភាគី ហើយបានសម្រេចចិត្តកាត់ផ្តាច់ទំនាក់ទំនងជាមួយស្ថាប័នដូចជាក្រុមប្រឹក្សាសិទ្ធិមនុស្សអង្គការសហប្រជាជាតិ អង្គការយូណេស្កូ និងអង្គការសុខភាពពិភពលោកជាដើម៕
ដោយ: តែម សុខុម
