សេដ្ឋកិច្ចពិភពលោក នឹងប្រឈមហានិភ័យធំៗ៣នៅឆ្នាំ២០២៦

សារព័ត៌មាន The Edge Malaysia បានរាយការណ៍ថា សម្ពាធពន្ធគយរបស់សហរដ្ឋអាម៉េរិកនៅតែជាដុំពពកខ្មៅជះស្រមោលស្រអាប់លើស្ថានភាពសេដ្ឋកិច្ចពិភពលោក។ ជាក់ស្តែងការគំរាមកំហែងចុងក្រោយបំផុតរបស់ប្រធានាធិបតីអាម៉េរិកលោក ដូណាល់ ត្រាំ ពាក់ព័ន្ធការដំឡើងពន្ធបន្ថែម១០០%លើទំនិញចិនបានបង្កឱ្យមានការភ័យខ្លាចជាថ្មីសម្រាប់សេដ្ឋកិច្ចពិភពលោក ការកើនឡើងបំណុលរបស់រដ្ឋាភិបាល និងធ្វើឱ្យប៉ះពាល់ដល់វិស័យបច្ចេកវិទ្យាបញ្ញាសិប្បនិម្មិត (AI)។

Bloomberg Economics បានអះអាងថា បញ្ហាទាំងនេះអាចនឹងក្លាយជាប្រធានបទសម្រាប់កិច្ចពិភាក្សា នៃក្រុមរដ្ឋមន្ត្រីហិរញ្ញវត្ថុ និងធនាគារកណ្តាលនៅទីក្រុងវ៉ាស៊ីនតោន នាសប្តាហ៍នេះ។ ការព្រួយបារម្ភទាំងនេះបានលេចឡើងស្របពេលដែលអស្ថិរភាពនយោបាយកំពុងកើតមាននៅប្រទេសមួយចំនួនដូចជាជប៉ុន និងបារាំងជាដើម។

លោកស្រី ខារ៉េន ឌីណាន់ (Karen Dynan) សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យ Harvard បាននិយាយក្នុងសន្និសីទសារព័ត៌មានកាលពីសប្តាហ៍មុនថា សេដ្ឋកិច្ចពិភពលោកត្រូវបានគេមើលឃើញថាហាក់មានភាពធន់ តែភាពធន់នេះទំនងជាមិនមាននិរន្តរនោះទេ។

ស្ថិតក្នុងស្ថានភាពបែបនេះ Bloomberg Economics បានព្យាករថា កំណើនសេដ្ឋកិច្ចពិភពលោកនៅឆ្នាំ២០២៥ នេះ នឹងសម្រេចបានក្នុងរង្វង់៣,២% តែនៅឆ្នាំក្រោយនឹងធ្លាក់ចុះមកនៅត្រឹម២,៩%។

បើយោងតាមរបាយការណ៍របស់វិទ្យាស្ថានហិរញ្ញវត្ថុអន្តរជាតិ គិតត្រឹមឆមាសទី១ឆ្នាំ២០២៥ ទំហំបំណុលពិភពលោកបានកើនដល់៣៣៨ទ្រីលានដុល្លារមានការកើនឡើងរហូតដល់២១ទ្រីលានដុល្លារ។ ក្រៅពីបញ្ហាបំណុល បញ្ហាបច្ចេកវិទ្យា ជាពិសេស AI ក៏ជាបញ្ហាគួរឱ្យព្រួយបារម្ភដែរ។ អ្នកសេដ្ឋកិច្ចនៅ Oxford Economics បានអះអាងថា ការរត់ប្រណាំង និងការប្រកួតប្រជែងជ្រុលលើ AI ដែលជាបច្ច័យនាំឱ្យមានការបង្ហូរទឹកប្រាក់ដ៏សម្បើម ក៏អាចបង្កជាហានិភ័យនៃការធ្លាក់ចុះសេដ្ឋកិច្ចផងដែរ៕

ដោយៈ សរ សុជាតិ