វៀតណាម ទទួលបានទុនវិនិយោគផ្ទាល់ពីបរទេសជាង២១ពាន់លានដុល្លារនៅឆមាសទី១ឆ្នាំនេះ
វៀតណាម នៅតែជាគោលដៅវិនិយោគដ៏ទាក់ទាញមួយនៅក្នុងតំបន់សម្រាប់ក្រុមហ៊ុនបរទេស ដោយនៅក្នុងរយៈពេល៦ខែឆ្នាំ២០២៥ ប្រទេសក្បែរខាងកម្ពុជា មួយនេះ ទាក…
កាលពីឆ្នាំ២០២៤ ប្រទេសវៀតណាម បាននាំចូលផ្លែទុរេនពីបរទេសក្នុងតម្លៃជាង១៦លានដុល្លារ កើនឡើង៨ដង បើធៀបនឹងឆ្នាំ២០២៣។ ការនាំចូលផ្លែទុរេនរបស់ប្រទេសនេះ បានបន្តកើនឡើង១,១៧% ទៀត ដោយឡើងដល់តម្លៃជិត១០លានដុល្លារនៅ៤ខែដំបូងក្នុងឆ្នាំ២០២៥ បើធៀបនឹងរយៈពេលដូចគ្នាកាលពីឆ្នាំ២០២៤។
ក្រុមអ្នកនាំចូលបាននិយាយថា ការកើនឡើងប្រជាប្រិយភាពរបស់ពូជទុរេនបរទេស ដូចជាទុរេនមូសាងឃីង (Musang King) របស់ប្រទេសម៉ាឡេស៊ី បានធ្វើឱ្យតម្រូវការនាំចូលកើនឡើងនៅក្នុងប្រទេសវៀតណាម ដែលជាអ្នកនាំចេញទុរេនធំជាងគេទីពីរលើពិភពលោកបន្ទាប់ពីថៃ។
លោក បួយ ភូ តុន (Bui Phu Ton) នាយកប្រតិបត្តិក្រុមហ៊ុននាំចូលផ្លែឈើមួយ ដែលមានមូលដ្ឋាននៅខេត្តដាក់ណុង (Dak Nong) ភាគកណ្តាលវៀតណាម បាននិយាយថា ការកើនឡើងការនាំចូលផ្លែទុរេនរបស់វៀតណាមនេះ គឺដោយសារតម្រូវការប្រើប្រាស់ពូជទុរេនបរទេសដូចជាមូសាងឃីង ជាដើម មានការកើនឡើង ចំពេលប្រទេសនេះ កំពុងដាំដុះពូជប្រភេទនេះ ដូច្នេះការផលិតនៅមានកម្រិត ខណៈការផ្គត់ផ្គង់ក្រៅរដូវមិនទាន់អាចបំពេញតម្រូវការបាន។ បើតាមការអះអាងរបស់លោក តុន វៀតណាម បានដាំទុរេនមូសាងឃីង នៅតំបន់ដីសណ្តទន្លេមេគង្គ និងតំបន់ខ្ពង់រាបភាគកណ្តាល ប៉ុន្តែទិន្នផលមានកម្រិតទាបនៅឡើយ។
បច្ចុប្បន្ន វៀតណាម កំពុងខិតខំប្រឹងប្រែងក្នុងការរក្សាកំណើនការនាំចេញផ្លែទុរេនរបស់ខ្លួន ដែលកំពុងធ្លាក់ចុះខ្លាំង ក្រោយអាជ្ញាធរគយចិន រឹតបន្តឹងលើការត្រួតពិនិត្យរកសារធាតុគីមីម្យ៉ាង ដែលអាចបង្កជាជំងឺមហារីក។ ជាក់ស្តែងការនាំចេញទុរេនរបស់វៀតណាម នៅក្នុងរយៈពេល៤ខែដំបូងឆ្នាំ២០២៥ បានដាំក្បាលចុះយ៉ាងគំហុកមកនៅត្រឹម១៣០លានដុល្លារប៉ុណ្ណោះ ដោយធ្លាក់ចុះ៧៤% បើធៀបនឹងរយៈពេលដូចគ្នាកាលពីឆ្នាំមុន៕
ដោយ៖ សុខ មង្គល
