ទីភ្នាក់ងារព័ត៌មានរបស់ម៉ាឡេស៊ី Bernama បានរាយការណ៍ថា លោក អាន់វ៉ា អ៊ីប្រាហ៊ីន នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ាន បានចាត់ទុកថ្ងៃទី២៦ ខែតុលា ឆ្នាំ២០២៥ ជាព្រឹត្តិការណ៍ប្រវត្តិសាស្ត្ររបស់ទីម័រខាងកើត ដែលបានក្លាយជាសមាជិកពេញសិទ្ធិរបស់អាស៊ាន និងបានបញ្ជាក់ជាថ្មីអំពីជោគវាសនារួមរបស់តំបន់ និងស្មារតី នៃចំណងមិត្តភាព និងសាមគ្គីភាពក្នុងតំបន់។ ថ្លែងក្នុងពិធីបើកកិច្ចប្រជុំកំពូលអាស៊ានលើកទី៤៧ និងកិច្ចប្រជុំកំពូលពាក់ព័ន្ធ លោក អាន់វ៉ា បានមានប្រសាសន៍ថា ការដាក់បញ្ចូលទីម័រខាងកើតបានផ្តល់នូវអត្ថន័យថ្មីដល់ចក្ខុវិស័យរបស់អាស៊ាន ដែលមានការរួបរួម និងឯកភាពគ្នា។
លោកបានបន្តថា នៅក្នុងសហគមន៍នេះការអភិវឌ្ឍរបស់ទីម័រខាងកើត និងស្វ័យភាពជាយុទ្ធសាស្ត្ររបស់ខ្លួន នឹងទទួលបានការគាំទ្រយ៉ាងរឹងមាំ និងយូរអង្វែង។ អាស៊ានដែលបង្កើតឡើងក្នុងឆ្នាំ១៩៦៧ ឥឡូវនេះមានសមាជិកចំនួន១១ប្រទេសរួមមានប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ វៀតណាម និងទីម័រខាងកើត។
លោក កៃ រ៉ាឡា ហ្សាណាណា ហ្គោស្មាវ ( Kay Rala Xanana Gusmão) នាយករដ្ឋមន្រ្តីទីម័រខាងកើត បានចាត់ទុកការក្លាយជាសមាជិកពេញសិទ្ធិរបស់ទីម័រខាងកើតមិនត្រឹមជាការសម្រេចក្តីសុបិនដ៏ធំនោះទេ ទេវាក៏ជាការបញ្ជាក់ភាពធន់ ការតាំងចិត្ត និងក្តីសង្ឃឹមផងដែរ។ នាយករដ្ឋមន្ត្រីរូបនេះបានសម្តែងការដឹងគុណចំពោះរដ្ឋជាសមាជិកអាស៊ាន ប្រធានអាស៊ាន និងលេខាធិការដ្ឋានអាស៊ាន ចំពោះការជឿទុកចិត្ត ការលើកទឹកចិត្ត និងសាមគ្គីភាពដ៏រឹងមាំកន្លងមក។ លោកបានអះអាងថា ចាប់តាំងពីបានដាក់ពាក្យនៅឆ្នាំ ២០១១ ទីម័រខាងកើតបានរៀបចំស្ថាប័ន កែទម្រង់គោលនយោបាយ និងពង្រឹងការត្រៀមខ្លួនក្នុងការចូលជាសមាជិករបស់អាស៊ាន។
ទីម័រខាងកើត ដែលទទួលបានឯករាជ្យពីឥណ្ឌូនេស៊ី កាលពីថ្ងៃទី២០ ខែឧសភា ឆ្នាំ២០០២ មានប្រជាជនសរុបប្រមាណ១,៤លាននាក់ ហើយសេដ្ឋកិច្ចប្រទេសនេះពឹងផ្អែកខ្លាំងលើការនាំចេញប្រេង និងឧស្ម័ន ខណៈវិស័យកសិកម្ម និងសេវាកម្មកំពុងរួមចំណែកកាន់តែខ្លាំងឡើងដល់ចំណូលជាតិ។ ផលិតផលក្នុងស្រុកសរុបរបស់ទីម័រខាងកើតបានកើនឡើង៣,៤%កាលពីឆ្នាំ២០២៤ ឈានដល់ជិត២ពាន់លានដុល្លារ ហើយត្រូវបានគេព្យាករថា នឹងកើនឡើង៣,៩%នៅឆ្នាំ២០២៥ ចំពេលអតិផរណាមានការថយចុះ និងធ្វើឱ្យប្រសើរឡើងនូវស្ថិរភាពសារពើពន្ធរបស់ប្រទេស៕
ដោយៈ សរ សុជាតិ
