ការហក់ចូលឧស្សាហកម្មសន្តិសុខរបស់វៀតណាម កំពុងបង្កឱ្យមានការបារម្ភពីបញ្ហាសិទ្ធិមនុស្ស
វៀតណាម ដែលជាអ្នកក្បែរខាងកម្ពុជា មានគម្រោងបង្កើតទីភ្នាក់ងាររដ្ឋមួយ ដើម្បីបង្កើតកម្មវិធីសន្តិសុខតាមអ៊ីនធឺណិត និងផលិតផលពាក់ព័ន្ធ ដែលជាវិធាន…
លោកបណ្ឌិត ជ័យ តិច អ្នកតាមដានការអភិវឌ្ឍសង្គម និងសេដ្ឋកិច្ច បានចាត់ទុកទីផ្សារក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) គឺជាដៃគូរដោះដូរពាណិជ្ជកម្មដ៏ធំជាងគេរបស់កម្ពុជា ដែលបានផ្តល់ផ្លែផ្កាយ៉ាងច្រើនដល់កំណើននាំចេញទំនិញរបស់កម្ពុជា ពិសេសផលិផលកសិកម្ម វាយនភណ្ឌកាត់ដេរ និងសម្ភារៈអគ្គិសនីជាដើម។ តែយ៉ាងណា អ្នកជំនាញរូបនេះយល់ឃើញថា កម្ពុជា គួរទាញសក្តានុពលពីកិច្ចព្រមព្រៀងនេះបន្ថែមទៀត ដ្បិតជញ្ជីងពាណិជ្ជកម្មនាំចេញ-នាំចូលរបស់កម្ពុជា ជាមួយទីផ្សារ RCEP នៅមានគម្លាតធំនៅឡើយ ដែលទាមទារឱ្យកម្ពុជា បង្កើនសមត្ថភាពផលិតរបស់ខ្លួនបន្ថែម ដើម្បីជំរុញដល់ការនាំចេញ ជាពិសេសក្នុងវិស័យ SME, ពង្រឹងសមត្ថភាពជំនាញវិជ្ជាជីវៈ និងបច្ចេកវិទ្យា, ការធ្វើពិពិធកម្មផលិតកម្ម និងជំរុញទាក់ទាញការវិនិយោគផ្ទាល់ពីបរទេសបន្ថែម។
ជាមួយគ្នានេះ អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា បានចាត់ទុកទីផ្សារ RCEP គឺជាទីផ្សារនាំចេញដ៏សំខាន់មួយរបស់កម្ពុជា ក្នុងការជួយជំរុញកំណើនសេដ្ឋកិច្ច។ សម្រាប់អ្នកជំនាញរូបនេះ ទីផ្សារ RCEP គឺជាទីផ្សារដ៏ធំ និងមានសក្តានុពលមួយនៅលើពិភពលោក ដែលប្រទេសនីមួយៗអាចចាប់យកឱកាសពីចំណែកទីផ្សារនេះ ដូច្នេះកម្ពុជាត្រូវបង្កើនការផលិតរបស់ខ្លួនបន្ថែមទៀត ដើម្បីប្រកួតប្រជែងជាមួយបណ្តាប្រទេសដទៃ ក្នុងការជំរុញការនាំចេញរបស់ខ្លួនចូលទៅកាន់ទីផ្សារដ៏ធំនេះ។
ស្រដៀងគ្នានេះដែរ ឧកញ៉ា ស៊ិន ចន្ធី អគ្គនាយកក្រុមហ៊ុនឡាញហល អិចប្រេស បានគូសបញ្ជាក់ថា តាមរយៈកិច្ចព្រមព្រៀម RCEP គឺបានបើកឱកាសឱ្យកម្ពុជា ពង្រើកនូវទីផ្សារនាំចេញថ្មីបន្ថែម ក្រៅពីទីផ្សារនៅតំបន់អឺរ៉ុប និងសហរដ្ឋអាម៉េរិក ព្រមទាំងជួយជំរុញឱ្យមានការតភ្ជាប់ផ្លូវដឹកជញ្ជូនថ្មីៗបន្ថែមផងដែរ។ សម្រាប់អ្នកជំនាញរូបនេះ ដើម្បីជំរុញកិច្ចដោះដូរពាណិជ្ជកម្មរបស់បណ្តាប្រទេសក្រោមកិច្ចព្រមព្រៀងនេះឱ្យបានកាន់តែប្រសើរថែមទៀត គឺចាំបាច់ត្រូវមានការជួបប្រជុំគ្នាឱ្យបានកាន់តែទូលំទូលាយ ដើម្បីស្វែងយល់អំពីបទពិសោធន៍ នៃការធ្វើពាណិជ្ជកម្មរវាងគ្នា និងរួមគ្នាដោះស្រាយបញ្ហាប្រឈមដែលអាចកើតមានឡើង។
គួរជម្រាបថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលជាកតិកាសញ្ញាពាណិជ្ជកម្មធំបំផុតរបស់ពិភពលោកបានចូលជាធរមានជាផ្លូវការកាលពីថ្ងៃទី១ ខែមករា ឆ្នាំ២០២២ ដោយមានប្រទេសជាសមាជិកចំនួន១៥ រួមមានប្រទសសមាជិកអាស៊ានចំនួន១១ បូករួមជាមួយប្រទេសចិន ជប៉ុន កូរ៉េខាងត្បូង អូស្ត្រាលី និងនូវែលសេឡង់។ របាយការណ៍របស់ក្រសួងពាណិជ្ជកម្ម បានបង្ហាញថា នៅក្នុងរយៈពេល១០ខែឆ្នាំ២០២៥ ទំហំដោះដូរពាណិជ្ជកម្មរបស់កម្ពុជា ជាមួយទីផ្សារ RCEP បានឈានទៅដល់ជាង៣២ពាន់លានដុល្លារកើនឡើងជាង១៦% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះការនាំចេញរបស់កម្ពុជា មានទំហំជាង៨ពាន់១រយលានដុល្លារ កើនឡើងជាង១០% ខណៈការនាំចូលមកកម្ពុជាវិញមានទំហំជាង២៤ពាន់៧រយលានដុល្លារកើនឡើងជាង១៨%៕
