វៀតណាមនឹងដាក់ឱ្យដំណើរការកម្មវិធីផ្តល់សេវាទេសចរណ៍តាមអនឡាញ ដើម្បីទាក់ទាញភ្ញៀវទេសចរ

អាជ្ញាធរវៀតណាមនឹងដាក់ឱ្យដំណើរការកម្មវិធី Supper App ដែលជាកម្មវិធីផ្តល់សេវាកម្មទេសចរណ៍តាមប្រព័ន្ធអនឡាញ និងប្រព័ន្ធស្វ័យប្រវត្តិកម្មដំណើរការដោយ AI ដើម្បីជួយសម្រួលដល់ភ្ញៀវទេសចរបរទេសក្នុងការបំពេញប្រតិបត្តិការដំណើរកម្សាន្តរបស់គេមកកាន់ប្រទេសវៀតណាម។ តាមផែនការកម្មវិធីនេះនឹងដាក់ឱ្យដំណើរការសាកល្បងនៅឆ្នាំ២០២៦ និងគ្រោងដាក់ឱ្យប្រតិបត្តិការពេញលេញនៅឆ្នាំ២០២៧។ ដំណើរការដោយបច្ចេកវិទ្យា AI កម្មវិធីថ្មីនេះនឹងជួយសម្រួលដល់ការផ្តល់ផែនការ និងការកក់សេវាកម្មនានាទាំងការធ្វើដំណើរ ស្នាក់នៅ ហូបចុក ដោយប្រព័ន្ធស្វ័យប្រវត្តិកម្ម ដែលមានការផ្ទៀងផ្ទាត់ភាពត្រឹមត្រូវផ្អែកលើ blockchain។

លោក ឃ្វៀន ទ្រុងខាញ់ (Nguyen Trung Khanh) ប្រធានអាជ្ញាធរជាតិ ទេសចរណ៍វៀតណាមបាននិយាយថា កម្មវិធីនេះត្រូវបានគេរំពឹងថា នឹងជួយដោះស្រាយបញ្ហារប៉ាត់រប៉ាយនៃព័ត៌មានពាក់ព័ន្ធនឹងសេវាកម្មទេសចរណ៍របស់វៀតណាម។

គួរបញ្ជាក់ថា នៅក្នុងរយៈពេល៧ខែឆ្នាំ២០២៥ វៀតណាម ទាក់ទាញភ្ញៀវទេសចរបរទេសបានជាង១២លាននាក់ កើនឡើងប្រមាណ២២,៥% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះភ្ញៀវទេសចរចិន មានប្រមាណ៣,១លាននាក់ កូរ៉េខាងត្បូង ប្រមាណ២,៥លាននាក់ តៃវ៉ាន់ ជាង៧សែននាក់ អាម៉េរិក ជាង៥សែននាក់ និងជប៉ុន ជិត៤សែននាក់៕

ដោយៈ សរ សុជាតិ