ក្រោយចរចាគ្នាមិនត្រូវ រដ្ឋបាលពន្ធអាម៉េរិក ក្រោមការដឹកនាំរបស់លោក ដូណាល់ ត្រាំ បានគំរាមដាក់ពន្ធ៥០% លើទំនិញនាំចូលពីសហភាពអឺរ៉ុប ភ្ជាប់ជាមួយការប្រកាសដាក់ពន្ធ២៥%លើទូរសព្ទស្មាតហ្វូនទាំងអស់ដែលនាំចូលទីផ្សារអាម៉េរិក ផងដែរ។ ក្រោមការគំរាមកំហែងពន្ធនេះអាចនឹងជំរុញក្រុមហ៊ុន Apple ដែលពឹងផ្អែកលើផលិកម្មនៅក្រៅសហរដ្ឋអាម៉េរិក និងក្រុមហ៊ុនធំៗមួយចំនួនទៀតដូចជា Amazon ក្រុមហ៊ុន Walmart និងក្រុមហ៊ុនអាម៉េរិកធំៗ ដំឡើងថ្លៃលើផលិតផលរបស់ខ្លួន។
លោក ដូណាល់ ត្រាំ បានអះអាងរថា លោកបានជូនដំណឹងដល់លោក ធីម ឃុក (Tim Cook) នាយកប្រតិបត្តិក្រុមហ៊ុន Apple ជាយូរមកហើយថា ទូរសព្ទ iPhone ដែលដាក់លក់នៅអាម៉េរិក គួរតែត្រូវបានផលិតនៅអាម៉េរិក មិនមែនប្រទេសឥណ្ឌា ឬកន្លែងផ្សេងទៀតនោះទេ ហើយប្រសិនបើ iPhone មិនផលិតនៅអាម៉េរិកទេ នោះ iPhone ត្រូវតែបង់ពន្ធ២៥% ដូចគេដែរ។
បើតាមការចុះផ្សាយរបស់សារព័ត៌មាន អេភី ទូរសព្ទស្មាតហ្វូនទាំងអស់ ដែលផលិតនៅបរទេសនឹងត្រូវបង់ពន្ធ នៅចុងខែមិថុនា ខាងមុខនេះ។ កន្លងមកនាយកប្រតិបត្តិក្រុមហ៊ុន Apple ធ្លាប់បានលើកឡើងថា បច្ចុប្បន្ននេះទូរសព្ទ iPhone ដែលកំពុងលក់នៅអាម៉េរិក គឺនាំចូលពីឥណ្ឌា ហើយ iPad និងឧបករណ៍ផ្សេងទៀតត្រូវបាននាំចូលពីប្រទេសវៀតណាម។
ពាក់ព័ន្ធតម្លៃវិញ អ្នកវិភាគបានអះអាងថា ក្រោយការដំឡើង២៥% ទូរសព្ទ iPhone ដាក់លក់នៅលើទីផ្សារសហរដ្ឋអាម៉េរិក អាចឡើងដល់១ពាន់៥០០ដុល្លារ ទៅ៣ពាន់៥០០ដុល្លារនៅក្នុង១គ្រឿងតាមប្រភេទនីមួយៗ៕
ដោយៈ សរ សុជាតិ
