លោក ត្រាំ អាចនឹងជួបជាមួយលោក ពូទីន ដើម្បីដោះស្រាយជម្លោះនៅអ៊ុយក្រែនឆាប់ៗនេះ

ក្នុងកិច្ចខិតខំប្រឹងប្រែងដើម្បីបញ្ចប់សង្គ្រាមនៅអ៊ុយក្រែនតាមការប្តេជ្ញាចិត្តរបស់ខ្លួន ប្រធានាធិបតីអាម៉េរិកលោក ដូណាល់ ត្រាំ អាចនឹងជួបជជែកផ្ទាល់មុខជាមួយលោក វ្ល៉ាឌីមៀ ពូទីន ប្រធានាធិបតីរុស្ស៊ីនៅសប្តាហ៍ក្រោយនេះ។ នេះបើតាមការអះអាងរបស់មន្ត្រីសេតវិមាន កាលពីថ្ងៃ៦ ខែសីហា ឆ្នាំ២០២៥ ខណៈសហរដ្ឋអាម៉េរិកកំពុងត្រៀមរៀបចំកញ្ចប់ទណ្ឌកម្មថ្មីបន្ថែម ដើម្បីដាក់សម្ពាធទីក្រុងមូស្គូ ឱ្យបញ្ចប់សង្រ្គាមនៅអ៊ុយក្រែន។

ប្រសិនបើជំនួបរវាងមេដឹកនាំទាំងពិតជាកើតឡើងមែន វានឹងក្លាយជាជំនួបទល់មុខជាលើកដំបូងរវាងមេដឹកនាំទាំងពីរ ចាប់តាំងពីលោក ចូ បៃដិន អតីតប្រធានាធិបតីអាម៉េរិកបានជួបជាមួយលោក ពូទីន ចុងក្រោយនៅឆ្នាំ២០២១ ពោលគឺមុនពេលរុស្ស៊ីវាយចូលឈ្លានពានអ៊ុយក្រែន៨ខែ។

មកទល់ពេលនេះលទ្ធភាព នៃជំនួបកំពូលរវាងមេដឹកនាំកំពូលរបស់អាម៉េរិក និងរុស្សីនៅសប្តាហ៍ក្រោយនៅមិនទាន់ធានាបានថា នឹងអាចកើតឡើង១០០%នៅឡើយទេ ប៉ុន្តែកាសែត New York Times បានរាយការណ៍ថា លោក ត្រាំ បានប្រាប់មេដឹកនាំអឺរ៉ុបក្នុងអំឡុងពេលសន្ទនាតាមទូរសព្ទកាលពីថ្ងៃពុធ ថា លោកមានបំណងជួបជាមួយលោក ពូទីន ហើយបន្ទាប់មកជួបជាលក្ខណៈត្រីភាគីរវាងលោក ជាមួយលោក ពូទីន និងលោក វ្ល៉ូឌីមៀ ហ្សេឡេនស្គី ប្រធានាធិបតីអ៊ុយក្រែន។

ពាក់ព័ន្ធនឹងជំនួបនេះ អ្នកនាំពាក្យសេតវិមានលោកស្រី ខារ៉ូលីន លីវីត (Karoline Leavitt) បាននិយាយថា រុស្ស៊ីបានបង្ហាញពីបំណងចង់ជួបជាមួយប្រធានាធិបតី ដូណាល់ ត្រាំ ហើយលោក ត្រាំ ក៏បានបង្ហាញពីការបើកចំហរក្នុងការជួបជាមួយលោក ពូទីន និងលោក ហ្សេឡេនស្គី ផងដែរ។

ដោយឡែកទីក្រុងមូស្គូ ឯណោះវិញ មានសេចក្តីរាយការណ៍ថា លោក ពូទីន បានទទួលជួបជាមួយនឹង បេសកជនពិសេសរបស់សហរដ្ឋអាម៉េរិកលោក ស្ទីវ វីតខុប (Steve Witkoff) ហើយក្រោយមកលោក ត្រាំ បានបង្ហោះសារលើបណ្តាញសង្គមរបស់លោកថា លទ្ធផលនៃជំនួបនេះមានវឌ្ឍនភាពល្អប្រសើរ៕

ដោយៈ សរ សុជាតិ