លោក ត្រាំ ត្រៀមកញ្ចប់ថវិកាដ៏សម្បើមរហូតដល់១៧០ពាន់លានដុល្លារ ដើម្បីបង្ក្រាបជនអន្តោប្រវេសន៍

ប្រធានាធិបតីអាម៉េរិក លោក ដូណាល់ ត្រាំ កំពុងរៀបចំសម្រាប់ផែនការពង្រីកការបង្ក្រាបជនអន្តោប្រវេសន៍ខុសច្បាប់បន្ថែមទៀតនៅឆ្នាំ២០២៦ ទោះបីចំណាត់ការនេះរងការរិះគន់ខ្លាំងពីប្រជាពលរដ្ឋក្នុងស្រុក និងក្រៅស្រុកក៏ដោយ។ ជាក់ស្តែងរដ្ឋបាលរបស់លោក ត្រាំ បានត្រៀមកញ្ចប់ថវិការហូតដល់១៧០ពាន់លានដុល្លារ ដើម្បីចំណាយលើការចាត់វិធានការប្រឆាំងនឹងជនអន្តោប្រវេសន៍រហូតដល់ឆ្នាំ២០២៩។

តាមគម្រោងអាជ្ញាធរអាម៉េរិក អាចនឹងបង្កើតសកម្មភាពប្រតិបត្តិការឆ្មក់ស្វែងរកជនអន្តោប្រវេសន៍តាមរោងចក្រ កសិដ្ឋាន និងតាមកន្លែងប្រកបរបរអាជីវកម្មផ្សេងៗ ដែលបន្តប្រើប្រាស់កម្លាំងពលកម្មជាជនអន្តោប្រវេសន៍ខុសច្បាប់។ នៅក្នុងឆ្នាំ២០២៥ អាម៉េរិកបាននិរទេសជនអន្តោប្រវេសន៍ជាង៦០ម៉ឺននាក់ ខណៈលោក ត្រាំ គ្រោងចាត់វិធានការឲ្យបានប្រមាណ១លាននាក់ចេញពីទីផ្សារការងារនៅអាម៉េរិក។

លោក ថម ហូមេន (Tom Homan) អ្នកទទួលបន្ទុកកិច្ចការអន្តោប្រវេសន៍នៅសេតវិមានបាននិយាយថា លោក ត្រាំ នឹងបន្តប្តេជ្ញាអនុវត្តតាមការសន្យារបស់លោក ដើម្បីប្រឆាំងនឹងជនអន្តោប្រវេសន៍។​ លោកបានអះអាងថា ចំនួនប្រតិបត្តិការ និងការចាប់ខ្លួនជនអន្តោប្រវេសន៍ខុសច្បាប់នឹងមានកំណើនកើនឡើង នៅឆ្នាំក្រោយ៕

ដោយៈ សរ សុជាតិ