លោក ត្រាំ ដៀលអង្គការ NATO ធ្ងន់ៗថា ឆ្កួតលីលា ក្រោយខឹងមិនជួយអន្តរាគមន៍បើកច្រកសមុទ្រហ័រម៉ូស

ការផ្ទុះប្រតិកម្មខ្លាំងៗរបស់លោក ត្រាំ នេះកើតមានឡើង ក្រោយពីសម្ពន្ធមិត្តសំខាន់ៗយ៉ាងតិចចំនួន៨ រួមមានចក្រភពអង់គ្លេស បារាំង អាល្លឺម៉ង់ អ៊ីតាលី អេស្ប៉ាញ អូស្ត្រាលី ជប៉ុន និងកូរ៉េខាងត្បូង បានបដិសេធមិនលូកដៃជួយអាម៉េរិក តាមការអំពាវនាវរបស់លោក ត្រាំ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន AFP នៅថ្ងៃទី១៨ ខែមីនា។

​​ដោយខឹងអង្គការបក្សសម្ព័ន្ធយោធា NATO និងបណ្ដាប្រទេសជាសម្ពន្ធមិត្តសំខាន់ៗមិនជួយអន្តរាគមន៍បើកច្រកសមុទ្រ Hormuz ប្រធានាធិបតីអាម៉េរិក លោក ដូណាល់ ត្រាំ បានពន្លះអង្គការ NATO ធ្ងន់ៗដោយដៀលថា ឆ្កួតលីលា ហើយថា អាម៉េរិកមិនត្រូវការជំនួយពីអ្នកណាឡើយ។ ជាការពិតណាស់ថា លោក ត្រាំ ចង់ឱ្យបណ្ដាប្រទេសជាសម្ពន្ធមិត្តជួយអន្តរាគមន៍ ដើម្បីការពារសុវត្ថិភាពកប៉ាល់ដឹកទំនិញឆ្លងកាត់ច្រកសមុទ្រ Hormuz ប៉ុន្តែប្រទេសជាច្រើនបានច្រានចោលគំនិតនេះ។ តួយ៉ាង ប្រធានាធិបតីបារាំង លោក អេម៉ានុយអែល ម៉ាក្រុង បាននិយាយថា ប្រទេសបារាំង នឹងមិនចូលរួមឡើយរហូតដល់ភាពតានតឹងនៅមជ្ឈិមបូព៌ាឈានទៅរកភាពធូរស្រាល ហើយប្រទេសជាច្រើនទៀតដូចជាចក្រភពអង់គ្លេស ជប៉ុន អូស្ត្រាលី និងកូរ៉េខាងត្បូងជាដើម ក៏បានបដិសេធមិនចូលរួមដែរ។

លោក ត្រាំ បានលើកឡើងទាំងឆ្អែតចិត្តថា ការបដិសេធនេះបានបង្ហាញយ៉ាងច្បាស់ថា អង្គការបក្សសម្ព័ន្ធយោធា NATO មិនគាំទ្រសហរដ្ឋអាម៉េរិកទាំងដែលអាម៉េរិកត្រូវការជំនួយក្នុងគ្រាអាសន្ន ហើយបានហៅសម្ពន្ធមិត្តនេះថា ជាផ្លូវឯកទិស ដែលមានន័យថា បើទៅហើយ គឺមិនអាចត្រលប់បកក្រោយវិញបាន។ ទោះជាយ៉ាងណា លោកបានអះអាងថា សហរដ្ឋអាម៉េរិក មានភាពរឹងមាំគ្រប់គ្រាន់ ដើម្បីធ្វើរឿងនេះតែម្នាក់ឯង។

ទោះបីជាបានរិះគន់បណ្ដាសម្ពន្ធមិត្តយ៉ាងណាក្ដី ក៏លោក ត្រាំ អះអាងថា សម្ធន្ធមិត្តទាំងនោះយល់ស្របថា ចាំបាច់ត្រូវតែប្រឆាំងអ៊ីរ៉ង់ជុំវិញកម្មវិធីនុយក្លេអ៊ែ​របស់ខ្លួន។ តម្លៃប្រេងបានហក់ឡើងខ្លាំងទូទាំងពិភពលោក ក្រោយអ៊ីរ៉ង់ ប្រកាសបិទច្រកសមុទ្រ Hormuz ដ៏មានសារសំខាន់ដែលមានរហូតដល់ទៅប្រមាណ២០% នៃប្រេងរបស់ពិភពលោកត្រូវដឹកឆ្លងកាត់ច្រកសមុទ្រមួយនេះ។

លោក ដូណាល់ ត្រាំ ក៏បានលើកឡើងដែរថា អាម៉េរិកអាចនឹងកាត់បន្ថយការចូលរួមរបស់ខ្លួននៅក្នុងសង្គ្រាមប្រឆាំងអ៊ីរ៉ង់ ក្នុងពេលឆាប់ៗនេះ ប៉ុន្តែមិនបានផ្តល់ផែនការច្បាស់លាស់សម្រាប់អ្វីដែលនឹងកើតឡើងបន្ទាប់នៅក្នុងប្រទេសអ៊ីរ៉ង់ នោះទ៕

ដោយ: តែម សុខុម