ថ្លែងក្នុងសន្និសីទសារព័ត៌មានក្រោយជំនួបជាមួយនាយករដ្ឋមន្ត្រីអ៊ីស្រាអែល លោក ប៊ីនចាមីន ណេតាន់យ៉ាហ៊ូ នៅគេហដ្ឋានរបស់លោកផ្ទាល់កាលពីថ្ងៃទី២៩ ខែធ្នូ ឆ្នាំ២០២៥ លោក ដូណាល់ ត្រាំ ប្រធានាធិបតីសហរដ្ឋអាម៉េរិក បានលើកឡើងថា អ៊ីរ៉ង់ អាចកំពុងព្យាយាមស្ដារកម្មវិធីអាវុធរបស់ខ្លួនឡើងវិញ បន្ទាប់ពីសហរដ្ឋអាម៉េរិក បានបើកការវាយប្រហារដ៏ធំមួយកាលពីខែមិថុនា កន្លងទៅ។ បើតាមការអះអាងរបស់លោក ត្រាំ អ៊ីរ៉ង់ អាចបង្កើតកម្មវិធីផលិតអាវុធនៅកន្លែងផ្សេងពីកន្លែងដែលអាម៉េរិក បានវាយប្រហារកន្លងមក។
ទន្ទឹមនឹងព្រមានទម្លាក់គ្រាប់បែកលើអ៊ីរ៉ង ជាលើកទីពីរ មេដឹកនាំប្រទេសមហាអំណាចផុតលេខរូបនេះ អះអាងថា៖«យើងដឹងច្បាស់ថា ពួកគេកំពុងទៅទីណា និងកំពុងធ្វើអ្វី ហើយខ្ញុំសង្ឃឹមថា ពួកគេនឹងមិនធ្វើបែបនោះឡើយ ព្រោះយើងមិនចង់ខ្ជះខ្ជាយប្រេងឥន្ធនៈជាមួយយន្តហោះទម្លាក់គ្រាប់បែក B-2 ទេ»។
លោក ត្រាំ បានបន្តថា កិច្ចពិភាក្សារបស់លោកជាមួយលោក ណេតាន់យ៉ាហ៊ូ លើកនេះ គឺផ្តោតលើការជំរុញកិច្ចព្រមព្រៀងសន្តិភាពដ៏ផុយស្រួយនៅក្នុងតំបន់ហ្គាហ្សា ដែលលោកកំពុងសម្របសម្រួល និងដោះស្រាយកង្វល់របស់អ៊ីស្រាអែល ពាក់ព័ន្ធនឹងអ៊ីរ៉ង់ និងក្រុមហេសបូឡានៅលីបង់។ អ៊ីរ៉ង់ ដែលបានធ្វើសង្គ្រាមប្រឆាំងនឹងអ៊ីស្រាអែលរយៈពេល១២ថ្ងៃ កាលពីខែមិថុនា បាននិយាយកាលពីសប្តាហ៍មុនថា ខ្លួនបានធ្វើសមយុទ្ធបាញ់មីស៊ីលលើកទី២នៅក្នុងខែនេះ៕
អត្ថបទ សួន ឡង់ទី
