លោក ត្រាំ ស្នើឱ្យកាត់បន្ថយការចំណាយរហូតដល់១៦៣ពាន់លានដុល្លារនៅឆ្នាំក្រោយ
ប្រធានាធិបតីអាម៉េរិក លោក ដូណាល់ ត្រាំ កាលពីសប្ដាហ៍មុនបានស្នើឱ្យកាត់បន្ថយការចំណាយរបស់សហព័ន្ធរហូតដល់១៦៣ពាន់លានដុល្លារនៅឆ្នាំក្រោយ ដោយការ…
នៅក្នុងបទសម្ភាស ជាមួយសារព័ត៌មាន NBC News កាលពីសប្តាហ៍មុន លោក ដូណាល់ ត្រាំ បានលើកឡើងថា លោកនឹងពន្យារឱសានវាទសម្រាប់ការដំណើរការលក់អាជីវកម្មរបស់ក្រុមហ៊ុន TikTok នៅលើទឹកដីសហរដ្ឋអាម៉េរិក ប្រសិនបើមិនសម្រេចបានកិច្ចព្រមព្រៀងណាមួយនៅត្រឹមថ្ងៃទី១៩ ខែមិថុនា ទេនោះ។
លោក ត្រាំ ធ្លាប់លើកឡើងថា លោកចូលចិត្ត TikTok ដែលជា App ថតវីដេអូខ្លីៗដ៏ពេញនិយមជាពិសេសក្នុងស្រទាប់យុវវ័យ បន្ទាប់ពីវាបានជួយឱ្យលោកទទួលបានការគាំទ្រពីក្រុមអ្នកបោះឆ្នោតវ័យក្មេងយ៉ាងច្រើនអំឡុងការបោះឆ្នោតជ្រើសរើសប្រធានាធិបតីអាម៉េរិក ក្នុងឆ្នាំ២០២៤ ឈានទៅរកការដណ្ដើមជ័យជម្នះក្លាយជាប្រធានាធិបតីទី៤៧ របស់សហរដ្ឋអាម៉េរិក សម្រាប់អាណត្តិទី២របស់លោក។
សូមបញ្ជាក់ថា លោក ដូណាល់ ត្រាំ បានពន្យារឱសាន២លើករួចហើយបូកទាំងលើកនេះសម្រាប់ការដំណើរការលក់អាជីវកម្មរបស់ក្រុមហ៊ុន TikTok នៅលើទឹកដីសហរដ្ឋអាម៉េរិក ដោយឱសានវាទលើកទី១ គឺនៅអំឡុងខែមករា។
ប្រភពច្បាស់ការបានទម្លាយឱ្យដឹងថា ការចរចាកិច្ចព្រមព្រៀងទិញលក់អាជីវកម្មរបស់ក្រុមហ៊ុន TikTok នៅលើទឹកដីសហរដ្ឋអាម៉េរិក ឱ្យទៅក្រុមហ៊ុនអាម៉េរិក បានដំណើរការទៅហើយ ប៉ុន្តែត្រូវបានផ្អាកទៅវិញ បន្ទាប់ពីប្រទេសចិន មិនព្រមអនុម័តឱ្យលក់ ក្រោយលោក ដូណាល់ ត្រាំ ប្រកាសដំឡើងពន្ធគយបដិការខ្ពស់កប់ពពកលើទំនិញចិន។
ប្រភពដដែលទម្លាយឱ្យដឹងកាលពីខែមេសា ថា ការចរចាកិច្ចព្រមព្រៀងនេះអាចនឹងបន្តនៅមុនឱសានវាទថ្ងៃទី១៩ ខែមិថុនា ប៉ុន្តែថា សេតវិមាន និងក្រុងប៉េកាំង ចាំបាច់ត្រូវដោះស្រាយជម្លោះពន្ធគយជាមុនសិន៕
ដោយ: តែម សុខុម
