តើពលរដ្ឋភៀសសឹកមានការយល់ឃើញបែបណា ក្រោយធនាគារបន្ធូរបន្ថយការបង់ការប្រាក់ និងប្រាក់ដើមដល់ពួកគេ?
គ្រឹះស្ថានធនាគារ និងមីក្រូហិរញ្ញវត្ថុបានផ្តល់ការអនុគ្រោះដល់អតិថិជនជាជនភៀសសឹកតាមរយៈការលើកលែងរាល់កម្រៃ និងការផាកពិន័យពាក់ព័ន្ធនឹងឥណទាន …
សេតវិមាន បានអះអាងកាលពីថ្ងៃពុធ ទី៣០ ខែកក្កដា ថា ចាប់ពីថ្ងៃទី២៩ ខែសីហា តទៅ អាម៉េរិកនឹងផ្អាកការលើកលែងពន្ធលើកញ្ចប់ពាណិជ្ជកម្មសម្រាប់ប្រទេសទាំងអស់។ ដូច្នេះរាល់ទំនិញដែលផ្ញើតាមបណ្តាញប្រៃសណីយ៍អន្តរជាតិ នឹងត្រូវវាយតម្លៃលើការបង់ពន្ធជាថ្មីផ្អែកលើប្រទេសដើម និងលើពន្ធបន្ទាន់របស់រដ្ឋបាលលោក ដូណាល់ ត្រាំ។
គោលបំណងនៃការផ្អាកការលើកលែងពន្ធនេះ គឺដើម្បីបង្ក្រាបការគេចវេសបង់ពន្ធ និងការដឹកជញ្ជូនសារធាតុញៀនសំយោគពីប្រទេសផ្សេងៗចូលមកសហរដ្ឋអាម៉េរិក។ ការដាក់ចេញចំណាត់ការនេះធ្វើឡើងក្រោយលោក ដូណាល់ ត្រាំ បានផ្អាកការលើកលែងពន្ធសម្រាប់កញ្ចប់ពាណិជ្ជកម្ម ដែលភាគច្រើនមានតម្លៃដឹកជញ្ជូនទាបពីចិន និងទីក្រុងហុងកុងកន្លងមក។
កញ្ចប់ពាណិជ្ជកម្មបរទេសដែលនាំចូលទៅសហរដ្ឋអាម៉េរិក អាចលើកលែងបានលុះត្រាតម្លៃលក់រាយរបស់មុខទំនិញនីមួយៗមានតម្លៃចាប់ពី៨០០ដុល្លារចុះក្រោម។ ក្រុមហ៊ុនពាណិជ្ជកម្មអេឡិចត្រូនិករបស់ចិន ដូចជា Temu និងក្រុមហ៊ុន Shein បានប្រើប្រាស់ការលើកលែងពន្ធនេះដើម្បីដឹកជញ្ជូនផលិតផលពីប្រទេសចិនដោយផ្ទាល់ទៅកាន់អ្នកប្រើប្រាស់ដោយឆ្លងកាត់ការយកពន្ធ និងការត្រួតពិនិត្យរបស់អាម៉េរិក។
នៅក្នុងឆ្នាំសារពើពន្ធ២០២៤ តម្លៃពន្ធលើកញ្ចប់ពាណិជ្ជកម្មមានតម្លៃទាបនាំចូលទៅកាន់សហរដ្ឋអាម៉េរិក មានទំហំជាង៦៤ពាន់លានដុល្លារ។ នេះបើយោងតាមទិន្នន័យគយ និងការពារព្រំដែនរបស់សហរដ្ឋអាម៉េរិក៕
ដោយ៖ សុខ មង្គល
