ឥទ្ធិពលនៃព្យុះទីហ្វុង កាជិគី បានបង្ខំឱ្យអាជ្ញាធរវៀតណាមជម្លៀសពលរដ្ឋជាងកន្លះលាននាក់ទៅកាន់កន្លែងមានសុវត្ថិភាព និងបានបញ្ជាឱ្យនាវានានាចូលកំពង់ផែ ខណៈទីក្រុង សាន់យ៉ា ភាគខាងត្បូងប្រទេសចិន រងការវាយប្រហារពីព្យុះនេះយ៉ាងចាស់ដៃ។ មជ្ឈមណ្ឌលឧតុនិយមជាតិរបស់ចិនបាននិយាយថា ព្យុះនេះបានបោកបក់លើឆ្នេរសមុទ្រភាគខាងត្បូងនៃកោះ ហៃណាន កាលពីល្ងាចថ្ងៃអាទិត្យ មុនពេលធ្វើដំណើរឆ្ពោះទៅកាន់ប្រទេសវៀតណាម។ ដោយឡែកការិយាល័យអាកាសធាតុរបស់វៀតណាមបានរាយការណ៍ថា នៅពេលបោកបក់ក្នុងប្រទេសចិនព្យុះនេះមានល្បឿនត្រឹមតែ១៦៦គីឡូម៉ែត្រក្នុងមួយម៉ោងប៉ុណ្ណោះ ប៉ុន្តែនៅពេលវាមកដល់វៀតណាម វាអាចមានល្បឿនរហូតដល់១៨០គីឡូម៉ែត្រក្នុងមួយម៉ោង។
ប្រព័ន្ធផ្សព្វផ្សាយធំៗរបស់វៀតណាមបានរាយការណ៍ថា ពលរដ្ឋវៀតណាមជិត៥៩ម៉ឺននាក់នាក់ត្រូវបានជម្លៀសចេញពីខេត្តចំនួន៤ ជាកន្លែងដែលរងការវាយប្រហារពីព្យុះទីហ្វុង កាជិគី នៅថ្ងៃទី២២៥ ខែសីហា ឆ្នាំ២០២៥។ នៅពេលនេះប្រតិបត្តិការដឹកជញ្ជូនតាមសមុទ្រ និងអាកាសនៅខេត្តនានាតាមបណ្តោយឆ្នេរសមុទ្រត្រូវបានផ្អាកជាបណ្តោះអាសន្ន។
ព្យុះ កាជិគី ត្រូវបានគេព្យាករថា អាចនឹងបង្កគ្រោះមហន្តរាយដល់វៀតណាមមិនចាញ់ព្យុះយ៉ាជី ដែលបានសម្លាប់ជីវិតមនុស្សប្រមាណ៣០០នាក់ និងបង្កការខូចខាតអស់ជាង៣,៣ពាន់លានដុល្លារកាលពីឆ្នាំមុននោះទេ។ ស្ថានភាពនៅតំបន់ឆ្នេរនៅក្នុងប្រទេសវៀតណាម កំពុងស្ថិតក្នុងស្ថានភាពប្រុងជើងការខ្ពស់ ស្របពេលដែលស្ថានភាពនៅប្រទេសថៃ ក៏កំពុងទទួលរងឥទ្ធិពលយ៉ាងចាស់ដៃពីព្យុះនេះផងដែរ។
តាមសេចក្តីរាយការណ៍របស់កាសែត the Nation បានឲ្យដឹងថា នៅថ្ងៃទី២៥ ខែសីហា ឆ្នាំ២០២៥ ការិយាល័យឧតុនិយមថៃបានព្យាករថា នឹងមានភ្លៀងធ្លាក់ខ្លាំងគ្របដណ្តប់ស្ទើរពាសពេញប្រទេស។ ទីក្រុងបាងកកត្រូវបានគេរំពឹងថា នឹងមានភ្លៀងធ្លាក់ខ្លាំងរហូតដល់កម្រិត៧០% រីឯស្ថានភាពអាកាសធាតុនៅបណ្តាខេត្តភាគខាងជើង ភាគឦសាន ភាគខាងកើត និងភាគខាងលិច ក៏នឹងប្រឈមនឹងភ្លៀងធ្លាក់ខ្លាំងផងដែរ៕
ដោយៈ សរ សុជាតិ
