សារព័ត៌មាន the Nation បានរាយការណ៍ថា ចក្រភពអង់គ្លេស បានដាក់ក្រុមហ៊ុនថៃ ចំនួន៤ ក្នុងបញ្ជីខ្មៅពីបទចោទបានផ្តល់ការគាំទ្រដល់រុស្ស៊ីក្នុងសង្គ្រាមប្រឆាំងនឹងអ៊ុយក្រែន ដែលជំរុញឱ្យមានការព្រមានពីរដ្ឋាភិបាលថៃ ក្នុងការធ្វើឱ្យប៉ះពាល់ដល់អាជីវកម្មក្នុងស្រុក និងមុខមាត់របស់ថៃ នៅលើឆាកអន្តរជាតិ។ តែយ៉ាងណាសារព័ត៌មាននេះមិនបង្ហាញឈ្មោះរបស់ក្រុមហ៊ុនទាំងនេះនោះទេ។
ពាក់ព័ន្ធបញ្ហានេះ លោកស្រី អារ៉ាដា ហ្វាងតុង (Arada Fuangtong) អគ្គនាយក នៃអគ្គនាយកដ្ឋានពាណិជ្ជកម្មបរទេសរបស់ថៃ បានពិភាក្សាជាមួយក្រុមហ៊ុនទាំង៤ ជាបន្តបន្ទាប់ ដើម្បីធានាថា ពួកគេយល់ពីផលវិបាកនៃច្បាប់របស់ចក្រភពអង់គ្លេស និងផលវិបាកកាន់តែទូលំទូលាយសម្រាប់ក្រុមហ៊ុន និងប្រទេសថៃ ទាំងមូល។
ក្រុមអ្នកជំនាញបានលើកឡើងថា នៅពេលនេះរូបភាពនៃផលប៉ះពាល់របស់ប្រទេសថៃ មិនអាចជៀសផុតពីក្រសែភ្នែករបស់បណ្តាប្រទេសលោកខាងលិច ដែលជាទីផ្សារដ៏សំខាន់សម្រាប់ការនាំចេញរបស់ថៃ បាននោះឡើយ។ កាលពីឆ្នាំ២០២៤ ការដោះដូរពាណិជ្ជកម្មរវាងថៃ និងចក្រភពអង់គ្លេស មានមានទំហំប្រមាណ៦,៥ពាន់លានដុល្លារ ខណៈពាណិជ្ជកម្មជាមួយប្រទេសរុស្ស៊ី មានទំហំប្រមាណ១,៥ពាន់លានដុល្លារ៕
ដោយៈ សរ សុជាតិ
