មន្ត្រីជាន់ខ្ពស់របស់ទីក្រុងវ៉ាស៊ីនតោន និងទីក្រុងប៉េកាំង នឹងជួបចរចាគ្នានៅទីក្រុងកូឡាឡាំពួរ ប្រទេសម៉ាឡេស៊ី ដើម្បីបន្ធូរបន្ថយភាពតានតឹង មុនជំនួបកំពូលរវាងលោក ដូណាល់ ត្រាំ ប្រធានាធិបតីអាម៉េរិក និងលោក ស៊ី ជីនពីង ប្រធានាធិបតីចិន ដែលត្រូវបានគេរំពឹងថា នឹងធ្វើឡើងនៅសប្តាហ៍ក្រោយនៅកូរ៉េខាងត្បូង។ មុនធ្វើដំណើរទៅកាន់ប្រទេសម៉ាឡេស៊ី ដើម្បីជួបពិភាក្សាជាមួយមន្ត្រីជំនាញរបស់ចិន រដ្ឋមន្ត្រីក្រសួងហិរញ្ញវត្ថុអាម៉េរិក លោក ស្កុត បេសសេន (Scott Bessent) បានប្រាប់ Fox Business ថា យន្តការផ្តល់អាជ្ញាបណ្ណថ្មីរបស់ទីក្រុងប៉េកាំងលើការនាំចេញរ៉ែកម្រមិនអាចទទួលយកបាននោះទេ ព្រោះវាមិនត្រឹមតែធ្វើឱ្យប៉ះពាល់ដល់អាម៉េរិកនោះទេ ថែមទាំងប៉ះពាល់ដល់ពិភពលោកទាំងមូលផងដែរ។
បច្ចុប្បនុ្ន ចិន បានក្តោបក្តាប់ទីផ្សារផ្គត់ផ្គង់រ៉ែកម្ររហូតដល់៧០% នៅលើពិភពលោក និងគ្រប់គ្រងផលិតកម្មរ៉ែកម្រនេះរហូតដល់៨០% ដោយរ៉ែនេះជាវត្ថុធាតុដើមដ៏សំខាន់សម្រាប់បម្រើឱ្យការផលិតផលិតផលសំខាន់ៗជាច្រើនរាប់ចាប់តាំងពីស្មាតហ្វូនរហូតដល់យន្តហោះចម្បាំង ខណៈអាម៉េរិក ជាទីផ្សារធំបំផុតនៅលើពិភពលោក។
បើយោងតាមការចុះផ្សាយរបស់សារព័ត៌មាន Bloomberg សម្រាប់ជំនួបនៅប្រទេសកូរ៉េខាងត្បូង លោក ត្រាំ មានបំណងជួបជាមួយលោក ស៊ី ដើម្បីរកចម្លើយពាក់ព័ន្ធការសង្ស័យជាច្រើនរបស់អាម៉េរិក ជុំវិញផលប្រយោជន៍ និងទីផ្សាររបស់អាម៉េរិក សម្រាប់ប្រទេសចិន។ តែយ៉ាងណា លោក ត្រាំ មិនទាន់បានបង្ហាញពីក្តីរំពឹងណាមួយសម្រាប់ជំនួបជាមួយមេដឹកនាំចិននេះនោះទេ។ ប៉ុន្តែលោកមានសុទិដ្ឋិនិយមថា ជំនួបនេះអាចនឹងផ្តោតលើការស្វែងរកដំណោះស្រាយលើការនាំចេញសណ្តែកសៀង រ៉ែកម្រ រហូតដល់រឿងនុយក្លេអ៊ែ និងការចរចារកសន្តិភាពនៅអ៊ុយក្រែន និងហ្គាហ្សាជាដើម។
ក្រុមអ្នកវិភាគរំពឹងថា មហាអំណាចកំពូលទាំងពីរនឹងអាចរកឃើញបទឈប់បាញ់ផ្នែកពាណិជ្ជកម្មជាមួយគ្នា ហើយភាគីទាំងពីរអាចរកស្វែងរកកិច្ចព្រមព្រៀងលើរ៉ែកម្រ និងកិច្ចព្រមព្រៀងសំខាន់ៗមួយចំនូនទៀត៕
ដោយៈ សរ សុជាតិ
