ក្រុមហ៊ុនអាម៉េរិក Micron ប្រកាសបោះទុនវិនិយោគប្រមាណជិត ១៩ពាន់លានដុល្លារអាម៉េរិក សាងសង់រោងចក្រផលិតបន្ទះឈីប Memory នៅសិង្ហបុរី។ ដំណឹងនេះបានកើតមានឡើង ស្របពេលមានការប្រកួតប្រជែងយ៉ាងខ្លាំងនៅក្នុងឧស្សាហកម្មបច្ចេកវិទ្យាបញ្ញាសិប្បនិម្មិត AI ដែលបានធ្វើឱ្យវិស័យនានារាប់ចាប់ពីគ្រឿងអេឡិចត្រូនិករហូតដល់អ្នកផ្តល់សេវាបច្ចេកវិទ្យា AI កំពុងប្រឈមមុខនឹងកង្វះបន្ទះឈីបអង្គចងចាំ គ្រប់ប្រភេទយ៉ាងខ្លាំង។
ក្រុមហ៊ុន Micron បានចេញសេចក្ដីថ្លែងការណ៍ថា ការវិនិយោគថ្មីដើម្បីសាងសង់រោងចក្រ ផលិតបន្ទះឈីបកម្រិតខ្ពស់ក្នុងរយៈពេល១០ឆ្នាំ ខាងមុខនេះ នឹងជួយឲ្យក្រុមហ៊ុនអាចបំពេញតម្រូវការទីផ្សារដែលកំពុងកើនឡើងសម្រាប់បន្ទះឈីបប្រភេទ NAND ដែលជំរុញដោយសារកំណើននៃបច្ចេកវិទ្យា AI និងកម្មវិធីផ្តោតលើទិន្នន័យ។
ក្រុមហ៊ុន Micron ផលិតបន្ទះឈីបរហូតដល់ទៅ ៩៨% នៃបន្ទះឈីប របស់ខ្លួននៅក្នុងប្រទេសសិង្ហបុរី ជាកន្លែងដែលក្រុមហ៊ុននេះ ក៏កំពុងសាងសង់រោងចក្រវេចខ្ចប់កម្រិតខ្ពស់មួយតម្លៃ ជាង៥ពាន់៥០០រយលានដុល្លារម៉េរិក សម្រាប់បន្ទះឈីបអង្គចងចាំកម្រិតបញ្ជូនខ្ពស់ (HBM) ដែលប្រើក្នុងបន្ទះឈីប AI ដែលគ្រោងនឹងចាប់ផ្តើមផលិតនៅឆ្នាំ២០២៧ ផងដែរ។
ក្រុមអ្នកវិភាគបានលើកឡើងថា កង្វះខាតការផ្គត់ផ្គង់បន្ទះឈីបអង្គចងចាំអាចអូសបន្លាយពេលរហូតដល់ចុងឆ្នាំ២០២៧ ទោះបីជាក្រុមហ៊ុនផលិតបន្ទះឈីបនេះ និងបណ្ដាក្រុមហ៊ុនគូប្រជែងសំខាន់ៗរបស់ខ្លួនដូចជា ក្រុមហ៊ុន Samsung និងក្រុមហ៊ុន SK Hynix របស់កូរ៉េខាងត្បូង ជាដើម មានគម្រោងបង្កើតខ្សែច្រវាក់ផលិតកម្មថ្មីៗ និងកំពុងជំរុញដើម្បីចាប់ផ្តើមផលិតកម្មឱ្យបានឆាប់រហ័សយ៉ាងណាក្ដី៕
ដោយ: តែម សុខុម
