ការនាំចេញអង្កររបស់ថៃ ធ្លាក់ចុះ៣០% នៅត្រីមាសទី១ ខណៈមានការព្រួយបារម្ភកាន់តែខ្លាំងចំពោះពន្ធគយរបស់លោក ដូណាល់ ត្រាំ
សមាគមអ្នកនាំចេញអង្ករថៃ បានឱ្យដឹងថា ការនាំចេញអង្កររបស់ថៃ ដែលជាប្រទេសនាំចេញអង្ករធំបំផុតទី២ ក្នុងពិភពលោក បានធ្លាក់ចុះរហូតដល់ទៅ៣០% នៅក្នុ…
ក្រសួងពាណិជ្ជកម្មអាម៉េរិក បានប្រកាសថា អាម៉េរិកបានត្រៀមខ្លួនរួចជាស្រេចហើយ ដើម្បីដាក់ពន្ធប្រឆាំងនឹងការលក់បង្ខូចថ្លៃ និងមិនស្មើភាពគ្នាលើបន្ទះសូឡា និង ឧបករណ៍សូឡា ដែលនាំចូលមកពីប្រទេសកម្ពុជា ថៃ វៀតណាម និងម៉ាឡេស៊ី។ សម្ពាធពន្ធដ៏ក្តៅគគុកនេះ នឹងត្រូវដាក់លើផលិតផលសូឡា ដែលអាម៉េរិករកឃើញថា បានទទួលអត្ថប្រយោជន៍ពីការកំណត់តម្លៃមិនយុត្តិធម៌ដោយក្រុមហ៊ុនបរទេស និងការឧបត្ថម្ភធនអយុត្តិធម៌ដល់ក្រុមហ៊ុនបរទេសដោយរដ្ឋាភិបាលរបស់ពួកគេ។នេះបើតាមទីភ្នាក់ងារសារព័ត៌មានជប៉ុននីកេដដែល។
បើតាមក្រសួងពាណិជ្ជកម្មអាម៉េរិក ការនាំចូលបន្ទះសូឡានឹងប្រឈមមុខនឹងការយកពន្ធខ្ពស់ ដែលប្រែប្រួលទៅតាមប្រទេសនីមួយៗ ពោលគឺអាម៉េរិកគ្រោងនឹងដាក់ពន្ធខ្ពស់រហូតដល់ជាង ៣,៤០០% លើប្រទេសកម្ពុជា, ប្រទេសថៃ ជិត៨០០%, វៀតណាមជាង ៥៤២% និង ប្រទេសម៉ាឡេស៊ី ជិត១៧០%។
ក្រុមហ៊ុនផលិតបន្ទះសូឡាធំៗមួយចំនួន ដូចជាក្រុមហ៊ុន Hounen Solar ក្រុមហ៊ុន Trina Solar Science & Technology និងក្រុមហ៊ុន Jinko Solar Technology កំពុងរងគ្រោះយ៉ាងដំណំដោយសារការដំឡើងពន្ធទាំងនេះ។
រោងចក្រផលិតបន្ទះសូឡារបស់ប្រទេសចិន បានធ្វើប្រតិបត្តិការនៅពាសពេញអាស៊ីអាគ្នេយ៍ដែលបានក្លាយជាអ្នកផ្គត់ផ្គង់ដ៏សំខាន់ដល់ឧស្សាហកម្មសូឡារបស់អាម៉េរិក នៅក្នុងនិន្នាការមួយ ដែលអាម៉េរិក មើលឃើញថា ជាការប៉ុនប៉ង ដើម្បីគេចពន្ធរបស់អាម៉េរិក លើទំនិញដែលនាំចូលដោយផ្ទាល់ពីប្រទេសចិន។
គណៈកម្មាធិការសម្ព័ន្ធសម្រាប់ពាណិជ្ជកម្មផលិតសូឡារបស់អាម៉េរិក បានចោទក្រុមហ៊ុនចិន ដែលធ្វើប្រតិបត្តិការនៅតំបន់អាស៊ីអាគ្នេយ៍ថា បានលក់គ្រឿងបន្លាស់សូឡាក្រោមតម្លៃទីផ្សារនៅសហរដ្ឋអាម៉េរិក និងទទួលបានប្រាក់ឧបត្ថម្ភដោយអយុត្តិធម៌ ដែលធ្វើឱ្យបន្ទះសូឡារបស់ អាម៉េរិកមិនអាចប្រកួតប្រជែងបានឡើយ៕
អត្ថបទ៖ សុខ មង្គល
