នាវារបស់ចិន និងហ្វីលីពីន បានប៉ះទង្គិចគ្នានៅតំបន់ជម្លោះ នៃប្រជុំកោះស្ព្រេតលី (Spratly) នៅសមុទ្រចិន ខាងត្បូង កាលពីថ្ងៃអាទិត្យ ដោយភាគីទាំងពីរបានចោទដាក់គ្នាទៅវិញទៅមកចំពោះការឈ្លានពានចូលក្នុងដែនទឹករបស់ពួកគេរៀងៗខ្លួន។
លោក លីន ជៀន (Lin Jian) អ្នកនាំពាក្យក្រសួងការបរទេសចិន បានជំរុញទីក្រុងម៉ានីល កុំឱ្យតតាំងនឹងកិច្ចខិតខំប្រឹងប្រែងក្នុងការការពារដែនអធិបតេយ្យ សិទ្ធិ និងផលប្រយោជន៍ដែនសមុទ្ររបស់ចិន បន្ទាប់ពីមានឧប្បត្តិហេតុប៉ះទង្គិចនាវាគ្នាកើតឡើង ខណៈហ្វីលីពីន បាននិយាយថា ចិន បានដាក់ពង្រាយកាណុងបាញ់ទឹក និងវាយប្រហារលើនាវារបស់ពួកគេ។
អ្នកនាំពាក្យក្រសួងការបរទេសអាម៉េរិក លោក ថូមី ភីហ្គូត (Tommy Pigott) បាននិយាយក្នុងសេចក្តីថ្លែងការណ៍មួយនៅដើមសប្តាហ៍នេះ ដោយបានថ្កោលទោសចិន ចំពោះការបើកបុក និងបាញ់ទឹកលើនាវារបស់ហ្វីលីពីន ហើយថា ទីក្រុងវ៉ាស៊ីនតោននឹងឈរនៅខាងសម្ពន្ធមិត្តហ្វីលីពីន ដែលបានប្រឈមមុខនឹងសកម្មភាពដ៏គ្រោះថ្នាក់របស់ចិន ដែលអាចបំផ្លាញដល់ស្ថិរភាពក្នុងតំបន់។
ប្រទេសចិន និងហ្វីលីពីន បានប្រឈមមុខដាក់គ្នាជារឿយៗនៅប៉ុន្មានឆ្នាំចុងក្រោយនៅក្នុង សមុទ្រចិន ខាងត្បូង ដែលជាផ្លូវពាណិជ្ជកម្មយុទ្ធសាស្ត្រជួយសម្រួលដល់ពាណិជ្ជកម្មអន្តរជាតិ ជាង៣ទ្រីលានដុល្លារ ហើយចិន បានទាមទារគ្រប់គ្រងភាគច្រើននៅក្នុងតំបន់នោះ។ ក្រោយកើតមានភាពតានតឹង លោក លីន ជៀន បានជំរុញហ្វីលីពីនបញ្ឈប់ជាបន្ទាន់នូវការបំពាន និងការបង្កហេតុ។
សហរដ្ឋអាម៉េរិក និយាយថា ការទាមទារទឹកដី និងដែនសមុទ្រដ៏ធំរបស់ចិន នៅសមុទ្រចិន ខាងត្បូង និងសកម្មភាពបង្ខិតបង្ខំកាន់តែខ្លាំងឡើងរបស់ចិន ទៅលើប្រទេសជិតខាងបានបន្តធ្វើឱ្យខូចស្ថិរភាពក្នុងតំបន់ ហើយប៉ះពាល់ដល់ការប្តេជ្ញាចិត្តពីមុនមករបស់ចិន ក្នុងការដោះស្រាយជម្លោះដោយសន្តិវិធី៕
ដោយ៖ សុខ មង្គល
