អាម៉េរិក ត្រៀមមូលនិធិរាប់ពាន់លានដុល្លារ ដើម្បីកាត់បន្ថយទំហំក្តោបក្តាប់ទីផ្សាររ៉ែកម្ររបស់ចិន

សារព័ត៌មាន Financial Times បានរាយការណ៍ថា សហរដ្ឋអាម៉េរិក កំពុងពិភាក្សាលើការរៀបចំកញ្ចប់មូលនិធិតម្លៃរាប់ពាន់លានដុល្លារ សម្រាប់ប្រើប្រាស់លើការរុករ៉ែកម្រ ដើម្បីប្រជែងជាមួយចិន ដែលកំពុងក្ដោបក្ដាប់ធនធានរ៉ែដ៏កម្រនៅលើពិភពលោកប្រមាណ៧០%។ រដ្ឋាភិបាលអាម៉េរិក កំពុងពិភាក្សាអំពីកញ្ចប់មូលនិធិនេះជាមួយក្រុមហ៊ុនវិនិយោគ Orion Resource Partners ដើម្បីពង្រីកការរុករករ៉ែកម្រនៅក្រៅប្រទេស ដើម្បីបំបែកការត្រួតត្រារបស់ចិន លើធនធានរ៉ែសំខាន់ៗ ដែលខ្លួនកំពុងត្រូវការ។

កញ្ចប់មូលនិធិនេះ មានទំហំរាប់ពាន់លានដុល្លារ ដោយនៅដំណាក់កាលដំបូងក្រុមហ៊ុន Orion Resource Partners បានបោះទុនវិនិយោគក្នុងទំហំ៦០០លានដុល្លារ ហើយក្រុមហ៊ុនអាម៉េរិក និងសា្ថប័នពាក់ព័ន្ធត្រូវបានគេរំពឹងថា អាចនឹងទម្លាក់ទុនវិនិយោគជាបន្តបន្ទាប់។

លោកស្រី ហ្រ្គេសេលីន បាស្ការ៉ាន (Gracelin Baskaran) នាយកកម្មវិធីសន្តិសុខរ៉ែ នៅមជ្ឈមណ្ឌលសិក្សាយុទ្ធសាស្ត្រ និងកិច្ចការអន្តរជាតិ ក្នុងទីក្រុងវ៉ាស៊ីនតោន បាននិយាយថា កិច្ចពិភាក្សានេះ បានបង្ហាញថា រដ្ឋបាលរបស់លោក ដូណាល់ ត្រាំ កំពុងព្យាយាមស្វែងរកកញ្ចប់មូលនិធិ ដើម្បីបំពេញមហិច្ឆតាលើការរុករករ៉ែដ៏ទូលំទូលាយរបស់ខ្លួន។

បើយោងតាមការចុះផ្សាយរបស់សារព័ត៌មាន CNBC ធនធានរ៉ែកម្រដែលជាតម្រូវការចាំបាច់សម្រាប់ការផលិតសព្វាវុធទំនើបៗ បញ្ញាសិប្បនិម្មិត អាគុយរថយន្តអគ្គិសនី និងឧបករណ៍បច្ចេកវិទ្យាផ្សេងៗ ត្រូវបានគ្រប់គ្រងជិត៧០% ដោយប្រទេសចិន។ ពាណិជ្ជករម្នាក់បានលើកឡើងដោយសុំមិនបញ្ចេញអត្តសញ្ញាណថា រ៉ែកម្រ គឺជាកូនសោរដ៏សំខាន់ និងមានទម្ងន់បំផុតរបស់ចិន ក្នុងការចរចាពាណិជ្ជកម្មជាមួយអាម៉េរិក។ ក្រៅពីសហរដ្ឋអាម៉េរិក សហភាពអឺរ៉ុប និងជប៉ុន សុទ្ធតែត្រូវការធនធានរ៉ែកម្រសម្រាប់បំពេញឱ្យខ្សែច្រវាក់ផលិតកម្មឧស្សាហកម្មបច្ចេកវិទ្យារបស់ខ្លួន៕

ដោយៈ សរ សុជាតិ