ជម្លោះព្រំដែនកម្ពុជា-ថៃ កំពុងហុចផលដល់វិស័យទេសចរណ៍វៀតណាម
នៅពេលនេះវិស័យទេសចរណ៍របស់វៀតណាម កំពុងត្រូវប៉ាន់ខ្លាំង ដោយគេបានព្យាករថា ប្រទេសនេះនឹងស្វាគមន៍អ្នកធ្វើដំណើរបរទេសបានជាង២២លាននាក់នៅឆ្នាំនេ…
ការទាមទារនេះកើតមានឡើង បន្ទាប់ពីក្រុងតៃប៉ិ បានត្អូញត្អែរថា មហាយក្សចិន បានដាក់លក្ខខណ្ឌជាច្រើនលើកោះតៃវ៉ាន់ សម្រាប់ការចូលរួមរបស់ខ្លួនក្នុងការចូលរួមកិច្ចប្រជុំកំពូលនេះ។ នេះបើយោងតាមការចុះផ្សាយរបស់ទីភ្នាក់ងារព័ត៌មានធំៗជាច្រើន។
ក្រសួងការបរទេសសហរដ្ឋអាម៉េរិក បាននិយាយកាលពីថ្ងៃពុធ ទី៥ ខែវិច្ឆិកា ថា សហរដ្ឋអាម៉េរិក បានទាមទារឱ្យចិន ត្រូវតែអនុញ្ញាតឱ្យកោះតៃវ៉ាន់ចូលរួមកិច្ចប្រជុំកំពូល APEC ដោយស្មើសិទ្ធិ ស្មើមុខ ស្មើមាត់ ដូចប្រទេសដទៃ នៅពេលចិន ធ្វើជាម្ចាស់ផ្ទះកិច្ចប្រជុំកំពូល APEC នៅឆ្នាំក្រោយនេះ។ កិច្ចប្រជុំកំពូល APEC ដែលគ្រោងធ្វើឡើងនៅខែវិច្ឆិកា ឆ្នាំ២០២៦ នៅទីក្រុងស៊ិនជិន (Shenzhen) ប្រទេសចិន នេះធ្វើឡើង ស្របពេលដែលទំនាក់ទំនងរវាងទីក្រុងតៃប៉ិ និងទីក្រុងប៉េកាំង កាន់តែតានតឹងតឹងដោយសារចិន បង្កើនការដាក់សម្ពាធផ្នែកយោធាលើកោះកោះតៃវ៉ាន់។
ក្រសួងការបរទេសចិន បានបញ្ជាក់នៅសប្តាហ៍នេះថា ចិន មិនហាមឃាត់ការចូលរួមរបស់កោះតៃវ៉ាន់ នោះទេ ប៉ុន្តែថា ការចូលរួមរបស់តៃវ៉ាន់ នៅក្នុងកិច្ចប្រជុំកំពូល APEC ត្រូវតែគោរពតាមគោលការណ៍នៃគោលនយោបាយចិនតែមួយ ដែលទីក្រុងប៉េកាំង ចង់សំដៅថា ទាំងកោះតៃវ៉ាន់ និងច្រកសមុទ្រតៃវ៉ាន់ ជាកម្មសិទ្ធិរបស់ចិន តែមួយ ប៉ុន្តែនេះជាអ្វីដែលរដ្ឋាភិបាលទីក្រុងតៃប៉ិ ច្រានចោលមិនទទួលស្គាល់រហូតមក។
អ្នកនាំពាក្យក្រសួងការបរទេសចិនលោកស្រី ម៉ៅ នីង (Mao Ning) បាននិយាយពីក្រុងប៉េកាំង ថា ប្រទេសចិននឹងបំពេញកាតព្វកិច្ចរបស់ខ្លួនជាម្ចាស់ផ្ទះ នៃកិច្ចប្រជុំកំពូល APEC ហើយរដ្ឋាភិបាលចិន បានបញ្ជាក់យ៉ាងច្បាស់អំពីជំហររបស់ខ្លួនលើការចូលរួមរបស់កោះតៃវ៉ាន់ នោះគឺកោះតៃវ៉ាន់ អាចចូលរួមក្នុងកិច្ចប្រជុំកំពូល APEC បានក្រោមឈ្មោះ ចិនតៃប៉ិ (Chinese Taipei) ហើយមិនអាចបញ្ជូនប្រធានាធិបតីកោះតៃវ៉ាន់ ទៅចូលរួមកិច្ចប្រជុំកំពូលនេះបានឡើយ ដើម្បីជៀសវាងបញ្ហានយោបាយ។
ជាការឆ្លើយតប រដ្ឋាភិបាលតៃវ៉ាន់ ដែលត្រូវបានជ្រើសតាំងតាមរយៈការបោះឆ្នោតតាមបែបប្រជាធិបតេយ្យនិយាយថា ប្រទេសចិនគ្មានសិទ្ធិនិយាយជំនួស ឬតំណាងឱ្យកោះតៃវ៉ាន់ នៅលើឆាកអន្តរជាតិនោះឡើយ។
សូមបញ្ជាក់ថា ក្នុងចំណោមប្រទេសជាសមាជិកទាំង២១ រួមទាំងសហរដ្ឋអាម៉េរិក នៃវេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ដែលត្រូវបានបង្កើតឡើងនៅឆ្នាំ១៩៨៩ ពោលគឺ៣៦ឆ្នាំមុន គ្មានប្រទេសជាសមាជិកណាមួយមានទំនាក់ទំនងការទូតជាផ្លូវការជាមួយតៃវ៉ាន់នោះទេ៕
ដោយ: តែម សុខុម
