វិបត្តិសង្គ្រាមនៅមជ្ឈិមបូព៌ាកំពុងគំរាមកំហែងឧស្សាហកម្មថៃ ខណៈវិស័យទេសចរណ៍ស្នើសុំកញ្ចប់សង្គ្រោះ៤២៧លានដុល្លារ

ស្របពេលដែលអណ្តាតភ្លើងសង្គ្រាមនៅមជ្ឈិមបូព៌ាកំពុងឆាបឆេះខ្លាំងលោក ស៊ូផាគិត ប៊ុនស៊ីរី (Supakit Boonsiri) អគ្គនាយកការិយាល័យសេដ្ឋកិច្ចឧស្សាហកម្មថៃបានគូសបញ្ជាក់ថា ហានិភ័យ នៃការបិទច្រកសមុទ្រ Hormuz គឺជាចំណុចស្លាប់រស់ ដែលនឹងធ្វើឱ្យតម្លៃប្រេង តម្លៃដឹកជញ្ជូន និងថ្លៃធានារ៉ាប់រងទំនិញសកលហក់ឡើងខ្ពស់។

តាមការព្យាករណ៍ ប្រសិនបើតម្លៃប្រេងឆៅកើនឡើងពីចន្លោះ៦០ទៅ៧០ដុល្លារទៅដល់១០០ទៅ១០៥ ដុល្លារក្នុងមួយបារ៉ែល នោះទិន្នផលឧស្សាហកម្មថៃនឹងធ្លាក់ចុះ០,១៥% ឬស្មើនឹងការបាត់បង់ទឹកប្រាក់ប្រមាណ៣៦៦លានដុល្លារ។ ក្នុងនោះវិស័យដែលរងគ្រោះខ្លាំងជាងគេរួមមានឧស្សាហកម្មស៊ីម៉ងត៍ និងបេតុង, ឧស្សាហកម្មកញ្ចក់, សេរ៉ាមិច និងក្បឿង និងវាយនភណ្ឌ ក្រដាស និងថាមពល។

ដោយឡែកវិស័យទេសចរណ៍ ក៏កំពុងស្ថិតក្នុងស្ថានភាពដុនដាបផងដែរ ក្នុងនោះសហព័ន្ធសមាគមទេសចរណ៍ថៃបានជួបពិភាក្សាជាមួយអាជ្ញាធរទេសចរណ៍ ដើម្បីស្នើសុំកញ្ចប់ថវិកាឧបត្ថម្ភចំនួន៤២៧ លានដុល្លារ ក្នុងគោលបំណងរក្សាស្ថិរភាពការងារ និងសេវាកម្មកម្សាន្ត ខណៈដែលតម្លៃប្រេងឡើងថ្លៃបានធ្វើឱ្យប៉ះពាល់ដល់ទំនុកចិត្ត និងលំហូរ នៃអ្នកធ្វើដំណើរអន្តរជាតិ។ វិធានការនេះ ត្រូវបានចាត់ទុកថា ជា ខែលការពារសេដ្ឋកិច្ចថៃ ក្នុងអំឡុងពេលដែលវិបត្តិថាមពលសកលកំពុងអូសបន្លាយ៕

ដោយៈ សរ សុជាតិ