ការអះអាងបែបនេះធ្វើឡើងក្រោយថៃ ចោទប្រកាន់ថា គ្រាប់មីនដែលជនជាតិចិនខាងលើជាន់ផ្ទុះបណ្តាលឱ្យរងរបួសដាច់ជើងជាគ្រាប់មីន ដែលកម្ពុជា ទើបដាក់ថ្មី។ ប្រមុខក្រសួងការពារជាតិ បានបដិសេធរាល់ការចោទប្រកាន់ដោយគ្មានមូលដ្ឋានរបស់ថៃ ហើយបានបញ្ជាក់ជាថ្មីថា កម្ពុជា មិនដែលបានដាក់មីនថ្មីនោះឡើយ។
ឯកឧត្តមឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ បានបញ្ជាក់នៅលើទំព័រហ្វេសប៊ុកផ្លូវការរបស់ខ្លួននៅថ្ងៃទី៣០ ខែវិច្ឆិកា ថា កាលពីវេលាម៉ោង៣:២០នាទីទៀបភ្លឺថ្ងៃទី២៩ ខែវិច្ឆិកា ឆ្នាំ២០២៥ កងការពារព្រំដែនលេខ៥០៣ របស់កម្ពុជា ដែលឈរជើងនៅក្នុងភូមិសាស្រ្តភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានឮសូរសំឡេងផ្ទុះគ្រាប់មីនចំនួន១គ្រាប់ ហើយក្រោយការពិនិត្យឃើញថា ទីតាំងឧបទ្ទវហេតុនេះបានកើតឡើងនៅក្នុងតំបន់ចម្ការមីនរបស់កម្ពុជា ដែលមានគ្រាប់មីនចាស់មិនទាន់ផ្ទុះ ដែលជាសំណល់ពីសម័យសង្គ្រាមជាយូរឆ្នាំមកហើយ។ ពាក់ព័ន្ធជនរងគ្រោះក្នុងករណីផ្ទុះមីននេះ ថ្នាក់ដឹកនាំក្រសួងការពារជាតិ រូបនេះ បានសង្កត់ធ្ងន់ថា ជនជាតិចិន ឈ្មោះ SHI JINGUI ដែលអាជ្ញាធរថៃ បានផ្សាយថា ជាជនរងគ្រោះក្នុងឧបទ្ទវហេតុជាន់មីននោះ ត្រូវបានក្រសួងមហាផ្ទៃកម្ពុជា បញ្ជាក់ថា ពុំមានឈ្មោះក្នុងប្រព័ន្ធទិន្នន័យកត់ត្រាអ្នកដំណើរចេញ-ចូលប្រទេសកម្ពុជា របស់អគ្គនាយកដ្ឋានអន្តោប្រវេសន៍នោះឡើយ។
ទន្ទឹមនេះ ប្រមុខក្រសួងការពារជាតិ បានបដិសេធនូវការចោទប្រកាន់ទាំងឡាយរបស់ភាគីថៃ ហើយបានបញ្ជាក់ថា ប្រទេសកម្ពុជា តែងតែគោរពអនុវត្តច្បាប់អន្តរជាតិ និងមិនដែលដាក់មីនថ្មីនោះទេ។ លើសពីនេះកម្ពុជា មិនត្រឹមតែបានខិតខំប្រឹងប្រែងបោសសម្អាតមីនដែលនៅសេសសល់ពីសង្គ្រាម ដើម្បីការពារអាយុជីវិត និងសុវត្ថិភាពរបស់ប្រជាពលរដ្ឋ ព្រមទាំងលើកកម្ពស់សេដ្ឋកិច្ចសង្គមប៉ុណ្ណោះទេ ថែមទាំងបានចូលរួមយ៉ាងសកម្មក្នុងការងារដោះមីននៅក្រោមឆ័ត្ររបស់អង្គការសហប្រជាជាតិផងដែរ។
ជាមួយគ្នានេះ ឯកឧត្តម ជំរុញឱ្យភាគីថៃ អនុវត្តឱ្យបានម៉ឺងម៉ាត់នូវកិច្ចព្រមព្រៀងដែលភាគីទាំងពីរបានឯកភាពគ្នារួចមកហើយ ដោយការងារដោះមីនមនុស្សធម៌នៅតាមព្រំដែនត្រូវធ្វើឡើងតាមរយៈក្រុមការងារ JCTF និងស្របតាម SOP ដែលបានឯកភាពគ្នា។ លើសពីនេះ ក្រសួងការពារជាតិ បន្តប្តេជ្ញាចិត្តក្នុងការលើកកម្ពស់សន្តិភាព ស្ថិរភាព និងភាពជាអ្នកជិតខាងល្អជាមួយថៃ និងដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ព្រមទាំងគោរពយ៉ាងខ្ជាប់ខ្ជួននូវសេចក្តីថ្លែងការណ៍រួមស្តីពីសន្តិភាពរវាងកម្ពុជា និងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕
