រដ្ឋាភិបាលវៀតណាម បានកំណត់យកការអប់រំ និងបណ្តុះបណ្តាល និងការអភិវឌ្ឍន៍ជំនាញវិទ្យាសាស្ត្រ និងបច្ចេកវិទ្យាជាការងារអាទិភាពខ្ពស់បំផុតរបស់ខ្លួន ជាមួយគោលដៅអភិវឌ្ឍន៍វិស័យអប់រំឱ្យឈានដល់ចំណាត់ថ្នាក់កំពូលទាំង២០ នៅលើពិភពលោកនៅត្រឹមឆ្នាំ២០៤៥។ ដើម្បីឈានសម្រេចគោលដៅនេះ វៀតណាម បានដាក់ចេញផែនការធ្វើកំណែទម្រង់ជាបន្តបន្ទាប់ រួមទាំងការកែសម្រួលកម្មវិធីសិក្សាហួសសម័យ សាលារៀនដែលមិនមានថវិការ និងវប្បធម៌នៃការសិក្សក្រៅម៉ោងលើសកម្រិតផងដែរ។
តាមរយៈគោលដៅនេះ រដ្ឋាភិបាលវៀតណាម បានសន្យាថា នឹងផ្តល់សៀវភៅសិក្សាដោយឥតគិតថ្លៃសម្រាប់កូនសិស្ស ការគ្រប់គ្រងស្វ័យភាពសកលវិទ្យាល័យ ការបង្កើនប្រាក់ឧបត្ថម្ភគ្រូបង្រៀន និងនិស្សិតបញ្ចប់ការសិក្សាជំនាន់ថ្មី ដែលបានទទួលការបណ្តុះបណ្តាលផ្នែកបញ្ញាសិប្បនិម្មិត និងជំនាញឌីជីថល។
តាមរយៈគោលដៅប្រកបដោយមហិច្ឆតានេះ វៀតណាម បានកំណត់យកឆ្នាំ២០៣០ ជាពេលដែលកុមារមានអាយុចាប់ពី៣-៥ឆ្នាំ អាចមានសិទ្ធិចូលរៀននៅថ្នាក់មត្តេយ្យ និងតម្រូវឱ្យយុវជន៨៥% ត្រូវតែបញ្ចប់ការសិក្សាកម្រិតវិទ្យាល័យ ដោយចេះភាសាអង់គ្លេស ជំនាញឌីជីថល និងជំនាញ AI កាន់តែខ្លាំង។
ពាក់ព័ន្ធនឹងកម្រិតឧត្ដមសិក្សាវិញ វៀតណាមនឹងធ្វើកំណែទម្រង់ដ៏ខ្លាំងបំផុត ដោយតម្រូវឱ្យសាកលវិទ្យាល័យទាំងអស់ត្រូវបំពេញតាមស្តង់ដាជាតិ ហើយមួយភាគប្រាំនឹងឈានដល់កម្រិតស្តង់ដាអាស៊ី។ នៅឆ្នាំ២០៣០ វៀតណាម សង្ឃឹមថា នឹងមានសាកលវិទ្យាល័យយ៉ាងតិច៨ជាប់ចំណាត់ថ្នាក់ក្នុងចំណោមសាកលវិទ្យាល័យកំពូលទាំង២០០នៅអាស៊ី និងមួយសាកលវិទ្យាបានបំបែកខ្លួនចូលទៅក្នុងកំពូលសាកលវិទ្យាទាំង១០០នៅលើពិភពលោកក្នុងវិស័យជាក់លាក់មួយចំនួន៕
ដោយ៖ សុខ មង្គល
