វៀតណាមនឹងដាក់ឱ្យដំណើរការព្រលានយន្តហោះធំបំផុតតម្លៃ១៣ពាន់លានដុល្លារនៅឆ្នាំក្រោយ

អាកាសយានដ្ឋានខ្នាតយក្សតម្លៃ១៣ពាន់លានដុល្លារអាម៉េរិករបស់វៀតណាម អាចនឹងជំនួសអាកាសយានដ្ឋានអន្តរជាតិ តាន់ ស៊ឺង ញ៉ាត (Tan Son Nhat) សម្រាប់គ្រប់ជើងហោះហើរអន្តរជាតិចាប់ពីឆ្នាំ២០២៦។ ក្រុមហ៊ុនសាជីវកម្មអាកាសយានដ្ឋានវៀតណាម បានឱ្យដឹងថា អាកាសយានដ្ឋានអន្តរជាតិ ឡុង ថាញ់ ដែលសាងសង់នៅលើផ្ទៃដី៥ពាន់ហិចតានេះនឹងក្លាយជាអាកាសយានដ្ឋានធំបំផុតរបស់ប្រទេសវៀតណាម។

អាកាសយានដ្ឋានអន្តរជាតិនេះនឹងគ្រប់គ្រងជើងហោះហើរអន្តរជាតិទាំងអស់ ដែលមានអ្នកដំណើរប្រមាណ១៩លាននាក់ក្នុងមួយឆ្នាំ បូករួមទាំងអ្នកដំណើរក្នុងស្រុកមួយចំនួនផងដែរ។ អាកាសយានដ្ឋាននេះនឹងផ្តោតលើជើងហោះហើរក្នុងស្រុក ដោយបម្រើអ្នកដំណើរប្រមាណ ៣០លាននាក់ក្នុងមួយឆ្នាំ។

ក្រុមអ្នកគាំទ្រនិយាយថា អាកាសយដ្ឋាអន្តរជាតិ ឡុង ថាញ់ នឹងក្លាយជាមជ្ឈមណ្ឌលជើងហោះរហើរដ៏សំខាន់ក្នុងតំបន់ ជួយកាត់បន្ថយការកកស្ទះនៅអាកាសយានដ្ឋានអន្តរជាតិ តាន់ ស៊ឺង ញ៉ាត និងលុបបំបាត់ភាពចាំបាច់ដែលត្រូវផ្ទេរអ្នកដំណើររវាងអាកាសយានដ្ឋាន។ ទោះជាយ៉ាងណា អាកាសយានដ្ឋានអន្តរជាតិ ឡុង ថាញ់ មានគុណវិបត្តិមួយ គឺវាមានចម្ងាយប្រមាណ៤០គីឡូម៉ែត្រពីទីប្រជុំជនក្នុងក្រុងហូជីមិញ ដែលធ្វើឱ្យការធ្វើដំណើរកាន់តែយូរសម្រាប់អ្នកទេសចរអន្តរជាតិ៕
ដោយ: តែម សុខុម