ដើម្បីធានាឲ្យដំណើរការជួញដូមាសក្នុងស្រុកឱ្យកាន់តែមានសុក្រឹតភាព និងធានាភាពប្រកួតប្រជែងក្នុងការធ្វើអាជីវកម្មក្នុងវិស័យជួញដូរមាស រដ្ឋាភិបាលវៀតណាម បានដាក់ចេញវិធានការគ្រប់គ្រងទីផ្សារកាន់តែតឹងរ៉ឹង តាមរយៈការបង្កើនការត្រួតពិនិត្យកាន់តែខ្លាំង និងផាកពិន័យកាន់តែធ្ងន់ ចំពោះការរំលោភបំពាននានា លើការជួញដូរមាសខុសច្បាប់ ដើម្បីឆ្លើយតបនឹងការវិវត្តថ្មីៗនៃតម្លៃមាសក្នុងស្រុក។
លោកស្រី ឃ្វៀន ឌីហុង (Nguyen Thi Hồng) ទេសាភិបាលធនាគារកណ្តាលវៀតណាម បានប្រាប់សភាថា ធនាគារកណ្តាលបានអនុវត្តវិធានការជាបន្តបន្ទាប់ ដើម្បីពង្រឹងបទប្បញ្ញត្តិទីផ្សារមាស និងដើម្បីដោះស្រាយគម្លាតរវាងតម្លៃមាសគីឡូក្នុងស្រុក និងតម្លៃមាសគីឡូអន្តរជាតិ ។ លោកស្រី បានអះអាងថា នៅឆ្នាំ២០២៥ នេះ តម្លៃមាសបានបំណែកកំណត់ត្រាម្តងហើយម្តងទៀតជាបន្តបន្ទាប់ ដូច្នេះវាចាំបាច់ណាស់ក្នុងការសម្របសម្រួលជាមួយក្រសួង និងវិស័យពាក់ព័ន្ធនានា ដើម្បីត្រួតពិនិត្យសកម្មភាពជួញដូរមាសនានា។
តម្លៃហាងឆេងមាសនៅវៀតណាម កាលពីដើមខែមេសា គឺមានគម្លាតពីតម្លៃមាសនៅលើទីផ្សារអន្តរជាតិ តែពី៥ ទៅ៧% ប៉ុណ្ណោះ តែនៅចុងខែមេសា និងដើមខែឧសភា គម្លាតតម្លៃមាសកើនឡើងដល់ជាង១៣%។ ទេសាភិបាលធនាគារកណ្តាលរូបនេះ បានគូសបញ្ជាក់ថា ការកើនឡើងគម្លាតតម្លៃមាសក្នុងស្រុក ធៀបនឹងអត្រាតម្លៃមាសពិភពលោក គឺកើតឡើងមួយផ្នែកដោយសារចិត្តសាស្ត្រទីផ្សារ។
គួរបញ្ជាក់ថា មាសនៅវៀតណាម បច្ចុប្បន្នត្រូវបានជួញដូរក្នុងតម្លៃជិត៤ ៦០០ដុល្លារ ក្នុង១តម្លឹង ស្របពេលតម្លៃមាសនៅលើទីផ្សារអន្តរជាតិ ត្រូវបានជួញដូរប្រមាណ៤ ៣០០ដុល្លារក្នុងមួយតម្លឹង៕
ដោយៈ សរ សុជាតិ
