គម្រោងផ្លូវដែកល្បឿនលឿនតម្លៃ៦៧ពាន់លានដុល្លាររបស់វៀតណាម កំពុងជួបវិបត្តិហិរញ្ញវត្ថុ

គម្រោងសាងសង់ផ្លូវដែកល្បឿនលឿនដ៏មហិច្ឆតាក្រោមទុនវិនិយោគរហូតដល់ទៅ ៦៧ពាន់លានដុល្លារអាម៉េរិករបស់វៀតណាម កំពុងប្រឈមនឹងវិបត្តិខ្វះហិរញ្ញវត្ថុធ្ងន់ធ្ងរ។ ក្រុមមន្ត្រីវៀតណាម មានការព្រួយបារម្ភយ៉ាងខ្លាំងចំពោះបញ្ហានេះ ពីព្រោះវិនិយោគិនកំពុងស្នើសុំឱ្យរដ្ឋជួយរ៉ាប់រងរហូតដល់៨០% នៃតម្លៃគម្រោងតាមរយៈការផ្ដល់កម្ចីដែលមានការធានា ការឧបត្ថម្ភធនលើការប្រាក់ ឬការផ្ដល់ហិរញ្ញប្បទានគ្មានការប្រាក់ជាដើម។

ក្រុមហ៊ុនធំៗពីររបស់វៀតណាម គឺក្រុមហ៊ុន VinSpeed ដែលជាបុត្រសម្ព័ន្ធរបស់ Vingroup និងក្រុមហ៊ុន Thaco កំពុងប្រកួតប្រជែងគ្នាយ៉ាងខ្លាំង ដើម្បីទទួលយកគម្រោងខ្នាតយក្សនេះ។ នៅក្នុងការប្រកួតប្រជែងនេះ ក្រុមហ៊ុន Thaco ចង់ខ្ចីប្រាក់រហូតដល់ទៅ៨០% នៃតម្លៃគម្រោងទាំងមូលពីធនាគារក្នុងស្រុក និងធនាគារក្រៅប្រទេស ដោយស្នើសុំឱ្យរដ្ឋាភិបាលវៀតណាម ជាអ្នកធានាលើកម្ចីឥណទានទាំងនោះ និងបង់ការប្រាក់ទាំងអស់រយៈពេល៣០ឆ្នាំ។

ទន្ទឹមនេះ ក្រុមហ៊ុន VinSpeed បាននិយាយថា ខ្លួននឹងចូលរួមក្នុងគម្រោងនេះលុះត្រាតែរដ្ឋាភិបាលវៀតណាម ផ្តល់កម្ចីគ្មានការប្រាក់រយៈពេល៣០ឆ្នាំ ដែលរ៉ាប់រងរហូតដល់ទៅ៨០% នៃថ្លៃគម្រោងទាំងមូល៕

ដោយ: តែម សុខុម